За паўгода 1000 мінчан захацелі стаць міліцыянерамі
Еўрарадыё паглядзела, якія льготы даюць міліцыянерам, ахоўнікам метро, міліцыянерам палка ППСМ пры паступленні на працу.
“Заробак, вядома, не вельмі вялікі, але гэта не важна. Ільготы — кватэру можна пабудаваць і далей, далей, далей”, — абітурыент Акадэміі МУС Сяргей на пытанне Еўрарадыё, чаму ён хоча быць міліцыянерам, нечакана перш за ўсё ўзгадвае менавіта пра льготы і выгады. І толькі пасля добрага тычка ўспамінае пра сацыяльную важнасць прафесіі міліцыянера.
Ільгот для ахоўнікаў і міліцыянераў сапраўды шмат. Здзіўляе, што абавязкі ўмяшчаюцца ў сем слоў, а вось умовы і льготы — некалькі радкоў!
Плюс датэрміновы выхад на пенсію, дадатковыя адпачынкі і выплаты дапамогі на аздараўленне. Да таго ж новаяўленага міліцыянера адразу ставяць на ўлік як таго, хто мае патрэбу ў жыллі, аплачваюць дарогу да адпачынку, часткова кампенсуюць арэнду жылля — 1,1 мільёна на чалавека. Таксама супрацоўнікі органаў унутраных спраў маюць прэміраванне за ўдзел у спартыўных мерапрыемствах і магчымасць навучацца ў Акадэміі МУС на бюджэтным аддзяленні са стыпендыяй.
І гэта ўсё ахоўніку ў метро! Шукаю шчасця ў аддзеле кадраў Мінскага метрапалітэна.
“І дзяўчат бяром, на кожны батальён па адной дзяўчыне, але калі вы праходзіце па здароўі. Праца па 12 гадзін у суткі, дзяжурствы па начах”, — і радуюць, і пужаюць мяне ў аддзеле кадраў мінскага метро.
Але мяне гэта не асабліва палохае — магчымыя ільготы грэюць душу. Ёсць розніца плаціць 16% за льготны крэдыт ці 5% для міліцыянераў?
У мінскім метро пацвярджаюць: у чаргу на льготную кватэру ставяць адразу.
Мінскі метрапалітэн: “У нас асобная льгота, і паставяць на ўлік і ў нас, і ў Мінгарвыканкаме, але колькі гэтая чарга будзе ісці, я вам не магу сказаць. Мо і 5 гадоў, а мо і 10”.
На сайце ГУУС Мінгарвыканкама ў раздзеле вакансій таксама шмат прапаноў. Участковыя, кінолагі, міліцыянеры ППСМ, а таксама міліцыянеры-вадзіцелі патрэбны ледзь не ў кожным раённым аддзеле ўнутраных спраў Мінска.
Да прыкладу, міліцыянеру-вадзіцелю аплачваюць частку навучання ў аўташколе, а за перапрацоўку і раскрыццё злачынстваў прэміруюць дадаткова.
Тэлефаную ў Заводскі раён — сюды ўладкоўваю знаёмага на пасаду ўчастковага ці вадзіцеля.
“А ў вас вышэйшая адукацыя ёсць? Для ўчастковага міліцыянера патрэбна вышэйшая адукацыя. Заробак — 5 мільёнаў, гэта я вам пачатковы заробак кажу”, — паведамляюць мне ў Заводскім раёне. Але калі я пачынаю распытваць, прапаноўваюць прыйсці і паказацца.
“Канечне, у нас не стопрацэнтная загружанасць кадраў, але гэта характэрна для любых прадпрыемстваў”, — разважае начальнік аддзела камплектавання Мінскага ГАУС Аляксандр Раманюк.
У мінскай міліцыі прызнаюцца, што апошнім часам кандыдатаў на некаторыя пасады пачалі правяраць… на дэтэктары ілжы.
“І, можна сказаць, ёсць вынік. Калі б не паліграф, мы б, магчыма, памыліліся ў выбары кандыдатаў. Магчыма, з наступнага года мы будзем усіх кандыдатаў правяраць на паліграфе”, — кажа Аляксандр Раманюк.
Пры гэтым адзначаюць, што, нягледзячы на льготы, атрымаць іх удасца не кожнаму — далёка не ўсе праходзяць адбор, хоць на дзень прыходзіць па 5 чалавек.
“За паўгода да нас прыйшло 1000 кандыдатаў, але добра, калі з 10 чалавек мы выбралі хаця б аднаго”, — падсумоўвае начальнік службы камплектавання мінскай міліцыі Аляксандр Раманюк.