Вы тут

З расійскімі мантажнікамі з БелАЭС дагэтуль не разлічыліся

Расійскія рабочыя ў Астраўцы / TUT.by

Расійскія мантажнікі, якія працавалі на Беларускай АЭС, дагэтуль не атрымалі заробак за ліпень, піша TUT.by. 

Як распавядала Еўрарадыё, 15 жніўня каля паўсотні рабочых зладзілі мітынг на галоўнай плошчы Астраўца. Яны патрабавалі выплаціць ім заробкі за два месяцы: многія мантажнікі ўжо купілі квіткі дадому, а заробленых грошай ім не выдалі. 

Спярша расіянам абяцалі аддаць грошы ў сярэдзіне жніўня, потым — да пачатку верасня. Згодна з дамовай мантажнікам мусілі аддаць ліпеньскі заробак да 15 верасня, але толькі 16 верасня яны атрымалі па 20%. Многія з іх ужо з'ехалі на вахту на іншыя аб'екты, каб зарабіць хоць нешта і кампенсаваць страты ад працы ў Беларусі.

На працу ў Беларусь мантажнікаў запрасіла кампанія АТ "Сезам". Галоўны інжынер кампаніі Сяргей Гусеў абяцаў, што грошы за чэрвень работнікі атрымаюць да вечара 19 жніўня, а потым ім аддадуць аванс за ліпень. І сапраўды, за чэрвень работнікаў разлічылі, але авансу за ліпень так і не выдалі. "Не ўсё і ад нашага жадання залежыць. Знайшлі грошы, каб ўсяму персаналу выплаціць камандзіровачныя і квіткі купіць, часткі персаналу ўжо аплацілі ліпень. Думаю, наступным тыднем усё закрыем", — патлумачыў Гусеў.

Цалкам разлік за ліпень атрымаў толькі адзін з рабочых — Аляксандр. Менавіта гэты мужчына і звярнуўся ў СМІ, калі зразумеў, што заробак могуць не даць. Аднак грошай за жнівень не пабачыў пакуль і ён.

Каб сачыць за галоўнымі навінамі, падпішыцеся на канал Еўрарадыё ў Telegram.

Мы штодня публікуем відэа пра жыццё ў Беларусі на Youtube-канале. Падпісацца можна тут.