Выпіў адну бутэльку — плаці як за 160
Вырашыў чалавек, напрыклад, выпіць гарэлачкі ў дзень заробку перад
домам, а з яго папросту могуць спагнаць штраф у памеры таго самага заробку. Вось
Еўрапейскае радыё і вырашыла разабрацца, што гэта насамрэч значыць для
беларусаў.
Мы папрасілі растлумачыць нам вызначэнні “грамадскае месца” і
“алкагольныя напоі” супрацоўніка прэсавай службы Мінгарвыканкама Яўгена Сачыка:
“Што такое “грамадскае месца” ў новым кодэксе ніяк
не абгаворана. Наконт алкаголю — гэты тэрмін акрэслены ў дэкрэце прэзідэнта №1.
Такімі лічацца алкагольныя напоі з памерам дозы этылавага спірту больш за 7
адсоткаў.
Грамадскімі месцамі лічацца ўсе месцы, якія знаходзяцца не ў
прыватнай ўласнасці. Кватэра, уласны дом — гэта не грамадскае месца.
Пад’езд
ужо з’яўляецца грамадскім месцам. Канцэртная зала незалежна ад формы ўласнасці
таксама з’яўляецца такім месцам. Кавярні, рэстараны — грамадскія месцы, але ж там
ужыванне алкаголю дазволена”.
Пад гэту
катэгорыю напояў, дарэчы, трапляе ўсё віно, нават дэсертнае, каньяк і моцнае
піва. Далей мы пацікавіліся, што ж прадугледжана законам за распіццё гэтых
напояў. Працягвае Яўген Сачык:
“Ужыванне
алкагольных напояў у грамадскім месцы ці з’яўленне ў нецвярозым стане. За
распіццё алкагольных напояў у парках, скверах, вуліцы, стадыёне і грамадскім
транспарце накладаецца спагнанне ў выглядзе штрафа ў памеры да 8 базавых
велічынь.
Пры паўторным правапарушэнні — да 15 б. в. ці нават адміністрацыйны
арышт да 25 сутак. Падобныя меры прымаюцца і ў выпадку знаходжання ў грамадскім
месцы ў нецвярозым стане, які крыўдзіць чалавечую годнасць”.
Атрымліваецца,
што калі вы вырашылі выпіць, напрыклад, што-небудзь алкагольнае, але мацней за
“Доктар Дызель”, то рыхтуйцеся заплаціць штраф, памер якога можа дасягнуць пры
паўторным затрыманні амаль 250 долараў.
Мы паспрабавалі даведацца, а што ж
адбываецца зараз непасрэдна на месцах.
Участковы інспектар Партызанскага
раёна Мінску Дзмітрый Лаўкіс паведаміў нам, што за першыя 6 дзён пасля
ўвядзення новага Адміністрацыйнага кодэксу затрыманняў за ўжыванне алкагольных
напояў яшчэ не было:
“На людзях гэта ніяк не адбілася. Піць не сталі
менш, дакладна. За сакавік у нас яшчэ не было затрыманняў за распіццё. А так
звычайна затрымліваем, дастаўляем на апорны пункт, высвятляем асобу. Далей
глядзім, што за чалавек.
Калі затрыманы пастаянна ўжывае алкаголь, нідзе не
працуе, то мы складаем пратакол, каб у далейшым можна было ўздзейнічаць на
чалавека. Калі нармальны чалавек упершыню трапіў да нас, то дастаткова проста
папярэдзіць.”
Такім чынам,
шаноўныя беларусы, калі вы вырашылі ўжыць алкаголь у грамадскім месцы —
некалькі разоў падумайце: ці каштуе адна бутэлька віна, выпітая на вуліцы,
штрафу, на які можна набыць 160 бутэлек і з задавальненнем ужыць дома?
Разам з Вамі спрабаваў выпіць у грамадскім месцы Зміцер Траўчук.