Выказваем заклапочанасць: Зяленскі едзе да Байдэна, а талібы ствараюць урад

Кароткі агляд сусветных навін / калаж Еўрарадыё
Кароткі агляд сусветных навін / калаж Еўрарадыё

Нафтавая пляма памерам на два Мінскі падбіраецца да берагоў Кіпра, а талібы паказваюць жанчынам іх месца. Ва ўрадзе.
 

Зяленскі ў Вашынгтоне

Украінскі лідар Уладзімір Зяленскі сёння сустракаецца з прэзідэнтам ЗША Джо Байдэнам.

На самай справе ўсё вельмі цікава. Для папярэдніка Байдэна — Дональда Трампа — адна памятная тэлефонная размова з Зяленскім абярнулася справай аб імпічменце.

У той тэлефоннай размове гаварылі пра Хантэра Байдэна — сына цяперашняга прэзідэнта. Ён у свой час уваходзіў у савет дырэктараў буйной украінскай газавай кампаніі. Трамп хацеў, каб у дачыненні да Хантэра пачалі расследаванне аб карупцыі.

На думку дэмакратаў, экс-прэзідэнт тады ціснуў на Зяленскага. Па словах Зяленскага, "ціснуць" на яго могуць толькі яго дзеці.

Карацей, паглядзім, ці будзе цень той непрыемнай для 45-га прэзідэнта ЗША тэлефоннай размовы лунаць у Белым доме ў час сустрэчы Зяленскага з 46-м прэзідэнтам.

У адміністрацыі, зрэшты, гавораць толькі пра тое, што гэтая сустрэча — паваротны момант у адносінах дзвюх краін, якія спрабуюць вывесці партнёрства на новы ўзровень.

Зяленскі хацеў перагаварыць з Байдэнам да таго, як амерыканскі прэзідэнт сустрэнецца са сваім калегам Уладзімірам Пуціным у Жэневе гэтым летам. Але графік склалі інакш.

 

Новы ўрад "Талібана"

Але вас, вядома, цікавіць, што Байдэн думае пра сітуацыю ў Афганістане. Байдэн кажа так: вывад войскаў паклаў канец буйным ваенным аперацыям ЗША па "пераробліванні" іншых краін.

Цяпер Афганістан думае, як перарабіць сябе сваімі сіламі, а талібы рыхтуюцца абвясціць новы склад урада. Чакаецца, што ён будзе інклюзіўным — па мерках "Талібана". Некалькі жанчын увойдуць туды, але зоймуць не вельмі высокія пасады. Міністэрскія пасады будуць ім недаступныя.

Ніхто з тых, хто ўваходзіў ва ўрад у апошнія 20 гадоў, не зможа зноў заняць там месца.

Каб нам не здавалася, што "прырода настолькі ачысцілася"

На найбуйнейшым нафтаперапрацоўчым сірыйскім заводзе адбыўся разліў нафты. Нафтавая пляма расплываецца па Міжземным моры і можа ўжо сёння дабрацца да Кіпра. Учора ўвечары да ўзбярэжжа заставалася ўсяго сем кіламетраў.

Праблемы пачаліся 23 жніўня. Высветлілася, што працякае цыстэрна, у якой знаходзіцца 15 тысяч тон нафты.

Журналісты СNN прааналізавалі спадарожнікавыя відарысы і кажуць, што разліў большы, чым меркавалася. Нафта разлілася ўжо на 800 квадратных кіламетраў — па плошчы гэта прыкладна 2,5 Мінска.

Турцыя, якая мае агульную мяжу і берагавую лінію з Сірыяй, ужо дапамагае ўзяць сітуацыю пад кантроль. На Кіпры таксама сказалі, што гатовыя дапамагчы.

 

Венецыі не прывыкаць да чумы

Сёння адкрываецца Венецыянскі кінафестываль. Гэта адзіны з найбуйнейшых аглядаў кіно, які пандэмія не толькі не спыніла, але нават у анлайн не завяла.

Усё гэта вельмі сімвалічна: Венецыі да эпідэмій не прывыкаць. Нават слова "каранцін" прыдумалі ў Венецыі: калісьці судны швартаваліся пры берагу на сорак дзён. Так высвятлялі, ці не прывёз экіпаж з сабой чуму.

Маскі ў Венецыі цяпер носяць не толькі ў дні карнавалу. Усе госці фестывалю ў памяшканнях абавязаны засцерагчы сябе і навакольных. Супрацоўнікі і госці фестывалю павінны прад'явіць адмоўны тэст на COVID-19, сертыфікат аб вакцынацыі або даведку пра тое, што толькі-толькі перахварэлі і антыцелы ў арганізме яшчэ ў дастатковай колькасці.

Сёлета фестываль адкрыецца новай карцінай іспанскага рэжысёра Педра Альмадовара. Ён працаваў над ёй у дні самага жорсткага каранціну ў Іспаніі.

Каб сачыць за галоўнымі навінамі, падпішыцеся на канал Еўрарадыё ў Telegram.

Мы штодня публікуем відэа пра жыццё ў Беларусі на Youtube-канале. Падпісацца можна тут.

Апошнія навіны

Галоўнае

Выбар рэдакцыі