У Расіі "па просьбах" маладых людзей павялічваюць прызыўны ўзрост
![Расійскія прызыўнікі / ТАСС](/sites/default/files/styles/gallery_main/public/2023-08/mil_rus_21_07.jpg.webp?itok=SDJpZEOP)
Расійскія прызыўнікі / ТАСС
Ніжнюю мяжу прызыўнога ўзросту на тэрміновую службу ў Расіі не будуць павышаць да 21 года, заявіў старшыня камітэта Дзярждумы па абароне Андрэй Картаполаў. Яго словы прыводзіць РІА "Новости". Але верхнюю мяжу, як і анансавалі, павысяць да 30 гадоў.
"Ніжнюю мяжу вырашана пакінуць 18 гадоў, бо вельмі шмат хлопцаў хоча пайсці служыць менавіта ў 18 гадоў", — сказаў дэпутат. Паводле яго, гэтыя нормы будуць выкарыстоўваць ужо падчас вясновага прызыву ў 2024 годзе.
Характэрна, што ў першым чытанні дэпутаты Дзярждумы пагадзіліся на змяненне прызыўнога ўзросту ў межах 21-30 гадоў. У тлумачальнай запісцы да праекта гаварылася, што павышэнне ніжняй мяжы прызыўнога ўзросту дасць маладым людзям магчымасць атрымаць адукацыю. У другім чытанні дэпутаты будуць галасаваць ужо за новы праект, у якім прызыўны ўзрост складае 18-30 гадоў. Цяпер на тэрміновую службу ў Расіі прызываюць маладых людзей ва ўзросце 18-27 гадоў.
Каб сачыць за галоўнымі навінамі, падпішыцеся на канал Еўрарадыё ў Telegram.
Мы штодня публікуем відэа пра жыццё ў Беларусі на Youtube-канале. Падпісацца можна тут.