У Калодзішчах пад Мінскам затрымалі паўсотні мігрантаў
Затрыманыя ў Калодзішчах замежнікі / t.me/pressmvd/
У Калодзішчах пад Мінскам затрымалі паўсотні мігрантаў, паведамляе МУС. Грамадзяне Ірана, Індыі, Пакістана, Сірыі, Судана і Шры-Ланкі жылі ў прыватных дамах у аграгарадку. "У нашу краіну яны заехалі наземным транспартам з Расіі, далей планавалі рухацца ў Еўрасаюз. Беларускія візы ў іх адсутнічалі", — заявілі ў міліцыі.
Агулам пры падтрымцы амапаўцаў затрымалі 54 чалавек. Іх прыцягнулі да адміністрацыйнай адказнасці і вышлюць з нашай краіны.
Гэта не першы сёлета выпадак затрымання мігрантаў у Калодзішчах. Пра такія здарэнні паведамлялася ў студзені і красавіку (яны былі і ў мінулым годзе). МУС час ад часу праводзіць "паказальныя акцыі" — нібыта ідзе барацьба з нелегальнай міграцыяй. Як вядома, Захад ускладае адказнасць за міграцыйны крызіс на мяжы Беларусі і краін ЕС на рэжым Аляксандра Лукашэнкі.
