У імкненні стаць больш масавай “Будзьма!” ўзяла курс на пашырэнне
Гэта пры тым, што за няпоўныя два гады кампанія правяла больш за тысячу мерапрыемстваў, якія наведала амаль 100 тысяч чалавек.
Пасля амаль двух гадоў паспяховай дзейнасці агульнанацыянальная грамадская культурніцкая ініцыятыва “Будзьма!” нечакана заявіла пра змены ў падыходах да працы і метадаў вядзення кампаніі. І гэта пры тым, што да сённяшняга дня метады “Будзьмы” не толькі не выклікалі нейкай адмоўнай рэакцыі, але і мелі значны плён.
Прынамсі, паводле словаў каардынатаркі кампаніі Ніны Шыдлоўскай.
Ніна Шыдлоўская: “Значную частку ўвагі мы аддаем літаратурным імпрэзам. Гэта больш за 500 сустрэчаў, на якіх прысутнічала больш як 24 тысячы чалавек. У гэтых сустрэчах удзельнічала больш за 69 пісьменнікаў. Відавочна, самым значнымі, уплывовымі мерапрыемствамі, якія маюць найбольшы рэзананс, з’яўляюцца канцэрты як асобных музыкаў, так і гуртоў”.
А былі яшчэ такія мерапрыемствы як шоў, курсы беларускай мовы, выставы, супольныя і спецыяльныя праекты накшталт “Тузін. Перазагрузка”, “Белая яблыня грому” ды іншыя. Прычым увага акцэнтавалася на тым, каб праводзіць гэтыя імпрэзы ў рэгіёнах.
Усё гэта, кажа каардынатар кампаніі Алена Макоўская, дало магчымасць згуртаваць людзей, якія цікавяцца беларускай культурай. Зараз жа прыйшоў час прыдумаць, якім чынам максімальна пашырыць кола такіх цікаўных.
Алена Макоўская: “На што мы будзем рабіць акцэнт у нашай працы ў гэтым годзе — актыўная супраца з трэндсетэрамі і лідэрамі субкультур. Арыентацыя — на праекты, якія маюць патэнцыял стаць папулярнымі сярод шырокага кола грамадскасці. Гэта адкрытасць і публічнасць мерапрыемстваў кампаніі “Будзьма!”. Дзейнасць “Будзьма!” карысна для краіны і грамадства. Таму — пабудова канструктыўных стасункаў з дзяржаўнымі ўстановамі ёсць для нас прыарытэтам. Мы разлічваем на партнёрскія стасункі і з Мінкультам, і з Мінадукацыі, і з Мінспорту. І вельмі важнай будзе супраца з прэсай”.
А яшчэ адзін каардынатар кампаніі, намеснік старшыні Партыі БНФ Ігар Лялькоў, пералічыў бліжэйшыя мерапрыемствы, арганізаваныя “Будзьмай!”
Ігар Лялькоў: “У клубе “Рэактар” пройдзе дастаткова нестандартнае мерапрыемства — дабрачынны канцэрт “Добры фэст”. Мы лічым, што гэтым мерапрыемствам мы надаем новы акцэнт нашай кампаніі. Мы хочам пераканаць людзей, што быць беларусам — гэта не толькі ганарыцца сваёй мовай, культурай, гісторыяй: гэта яшчэ і быць адказным. За сябе і за тых, каму патрабуецца твая дапамога. Усе сродкі ад фэсту пойдуць на падтрымку дзяцей-інвалідаў Чэрвеньскага дома-інтэрната”.
А на наступны дзень там жа пройдзе канцэрт, прысвечаны… літары “Ў”. Ужо і песня пра гэтую ўнікальную літару напісаная, і кліп шыкоўны на яе здымаецца. А выхад кампаніі на міжнародны ўзровень будзе адзначаны ўдзелам у фэсце “Be2gether”. Таксама будуць паштоўкі з “маркёрамі” беларускай спадчыны — такімі як Уладзімір Мулявін, “Ў”, крылатыя гусары Вялікага княства Літоўскага і гэтак далей.
Удзельнік праектаў “Будзьмы!” літаратар Уладзімір Арлоў прапанаваў кампаніі правесці мастацка-літаратурны конкурс для дзяцей на тэму “Пяць рэчаў, якія сведчаць, што мы беларусы”.
А спявак Зміцер Вайцюшкевіч пахваліўся, што дзякуючы “Будзьме!” аб’ехаў ледзь не ўсю Беларусь.
Зміцер Вайцюшкевіч: “Я праехаў 25 краін з канцэртамі. У той жа час, у Копысе, у Гарадку ці дзесьці там у Друве, куды не кожная птушка даляціць, я выступаў!”
Крыху астудзіў імпэт першых асоб “Будзьмы!” вакаліст гурта “Da Vinci” Дзяніс Дудзінскі. Кажа, калі мяняць стратэгію кампаніі, то ў бок арганізацыі грандыёзных мерапрыемстваў: да прыкладу — канцэрт “Rammstein” з беларускімі гуртамі на “разагрэве”. А замест Мулявіна на паштоўках трэба паказаць выявы карцін вядомых мастакоў у незвычайнай апрацоўцы.
Дзяніс Дудзінскі: “Да прыкладу, узяць карціны Рэмбранта — і апрануць яе ў беларускую вопратку. Тут табе і інтэграцыя ў сусветную культуру, і элементарны момант беларусізацыі”.
Праўда, адразу заўважыў, што праект “Тузін. Перазагрузка”, дзе небеларускамоўныя гурты выканалі свае хіты па-беларуску, яго вельмі ўразіў. І прызнаўся, што калі знойдзецца нехта, хто напіша тэксты да іх песень на мове, то “Da Vinci” гатовыя запісаць беларускамоўны альбом.
Каардынатары “Будзьмы!” са свайго боку запісалі ўсе прапановы і паабяцалі, што абавязкова “ўпішуць” іх у сваю “новую стратэгію”.
Фота: Tarantino