У Беларусі вызначылі віды дзейнасці для рамеснікаў
![Чыноўнікі абяцалі "захаванне аўтэнтычных, самабытных рамёстваў"](/sites/default/files/styles/gallery_main/public/2024-09/ram.jpg.webp?itok=mA3heh_8)
Чыноўнікі абяцалі "захаванне аўтэнтычных, самабытных рамёстваў" / БЕЛТА
У Беларусі вызначылі віды дзейнасці для рамеснікаў. Адпаведную пастанову прыняў урад, яна пачне дзейнічаць з 1 кастрычніка.
У спіс дазволеных відаў дзейнасці трапілі бондарства, выраб і рамонт пячной дэкаратыўнай кафлі, саней, павозак і дзіцячых санак, вырабаў ручнога ткацтва, вязання, вышыўкі, макрамэ, карункапляцення і валення, вырабаў з дрэва мастацкай апрацоўкі, кухоннага інвентару, лялек, дэкаратыўнага пано і рознага роду сувеніраў, вырабаў з каменя і керамікі, выраб беларускага нацыянальнага касцюма, нацыянальных музычных інструментаў, выраб пражы, кавальская справа, мастацкая апрацоўка і роспіс вырабаў з дрэва, каменя, косці, скуры, рога, металу, керамікі, фанеры, прадстаўленых спажыўцом.
Тымі відамі дзейнасці, якія ў спіс не трапілі (напрыклад, выраб вясельных аксесуараў, свечак і мыла), можна будзе займацца ўжо ў якасці самастойнай прафесійнай дзейнасці.
Скарачэнне колькасці відаў рамеснай дзейнасці ў жніўні абмяркоўвалася на нарадзе ў Аляксандра Лукашэнкі. Міністр эканомікі Юрый Чабатар абяцаў "захаванне аўтэнтычных, самабытных нашых рамёстваў": "Усё гэта павінна вырабляцца рамеснікамі сваімі рукамі і з дапамогай прымітыўных прылад працы" (выкарыстанне рамеснікамі прамысловых машын і абсталявання забаронена).
Каб сачыць за галоўнымі навінамі, падпішыцеся на канал Еўрарадыё ў Telegram.
Мы штодня публікуем відэа пра жыццё ў Беларусі на Youtube-канале. Падпісацца можна тут.