У Баранавічах не дазволілі пікет супраць збяднення насельніцтва
Чыноўнікі палічылі, што заяўленыя яго мэты не адпавядаюць рэальнай сітуацыі ў горадзе.
Баранавіцкія гарадскія ўлады не дазволілі пікет супраць збяднення насельніцтва. Яго збіраўся правесці 22 жніўня лідар мясцовай суполкі прафсаюза РЭП Рыгор Грык. Вось што ён распавёў Еўрарадыё пра прычыны адмовы:
"Яны аргументуюць тым, што ў мэтах пікета я недакладна пазначыў, што ў горадзе стратныя прадпрыемствы і малыя заробкі. Яны спасылаюцца на мясцовую праўладную газету і артыкул згадваюць, што ў нас за апошнія паўгады зменшылася колькасць стратных прадпрыемстваў і што заробкі ў нас вельмі добрыя. Хай бы яны лепш прыйшлі на той пікет і там даказалі, што ў нас вельмі добрыя заробкі і прадпрыемствы працуюць, і няма стратных. І што ў бюджэт шмат грошай трапляе".
Пры гэтым Грык спасылаецца на публікацыі ў незалежнай прэсе пра рэальную эканамічную сітуацыю ды на размовы з працоўнымі. З іх вынікае зусім іншая карціна.
Фота: Fotolia