Testamentum Terrae “Angleza”
Калі ты – прыхільнік дуды, жалейкі, рыцараў і прыўкрасных дам – табе неабходна набыць альбом гурта Testamentum Terrae “Angleza”.
Калі ж цябе раздражняюць гукі дуды і ты спакойна ставішся да рыцараў -
альбом гурта Testamentum Terrae “Angleza” можна і не слухаць, альбо
праслухаць для агульнага развіцця!
У альбом увайшло 11
кампазіцый і рэмікс на выдатнейшы твор пласцінкі – песню “Па саду, па
саду”. Варта адзначыць, што матэрыял Testamentum Terrae збольшага
арыентаваны на фальклорныя мелодыі ў адрозненні ад гераічнага гарадскога
эпасу, уласцівага рыцару беларускай дуды – гурту “Стары Ольса”. Ну як
тут яго не прыгадаць! “Angleza” Testamentum Terrae больш лірычная, часам
сумная, як беларуская жаночая журба ў старажытных песнях.
Апроч так званай жаночай лірыкі - пранікнёна выкананых вакалісткамі гурта песень, ёсць месца на пласцінцы “Angleza” і мужчынскім гарачым песням, дзе суседнічаюць жарт і героіка, як, напрыклад, у “Гандзюленьцы”.
Песні на дыску гурта Testamentum Terrae “Angleza” змяняюцца рознахарактарнымі інструментальнымі нумарамі. Тут можна сустрэць вясёлага “Каваля” – таго самага, з “Палацу”.
Збольшага ў інструментальных кампазіцыях меладычную лінію вядзе дуда. Вядома, у Testamentum Terrae без дуды і не туды, і не сюды. Аднак часам яе навязлівы тэмбр робіцца прыемным і нават крыху пяшчотным. Як у аднайменнай назве альбома кампазіцыі.
Увогуле, альбом пакідае ўражанне прадуманай, адказна зробленай і правільна выбудаванай працы. У межах стылю. Аднак ёсць у ім надзея – рэмікс на вышэй узгаданую “Па саду, па саду”. Такі нясмелы крок на шырэйшую дарогу, такі дотык да будучыні. Вельмі ўдалы дотык. І крок. Хочацца непрадказальнасці і смеласці. Не ўсе межы маюць мытню:)