Сёння ў Мінску пройдзе суд над Максімам Вінярскім
Працэс над актывістам кампаніі "Еўрапейская Беларусь" пройдзе ў судзе Савецкага раёна сталіцы (Мінск, Лагойскі тракт, 3).
Пра гэта паведаміла праваабаронца Юлія Сцяпанава. Паколькі дакладны час суда невядомы, актывісты будуць дзяжурыць у судзе з 10-й гадзіны раніцы.
Як інфармуе БелаПАН, Вінярскага затрымалі 29 жніўня на вуліцы Багдановіча па шляху ва ўрочышчы Курапаты, дзе праходзіла штомесячная талака. Паводле папярэдніх звестак, актывіста могуць абвінаваціць у хуліганстве.
Падчас свайго апошняга арышту, які Вінярскі адбываў у Цэнтры ізаляцыі правапарушальнікаў напярэдадні чэмпіянату свету па хакеі, ён трымаў сухую галадоўку.
Фота з сацыяльных сетак
