Святлана Ціханоўская — пра загінулага ва Украіне беларускага байца
![Святлана Ціханоўская — пра загінулага ва Украіне беларускага байца](/sites/default/files/styles/gallery_main/public/2023-08/volat_0.jpg.webp?itok=rQpEt2-a)
Святлана Ціханоўская адрэагавала на гібель ва Украіне беларускага байца. У баі за вызваленне ад расіян аднаго з украінскіх населеных пунктаў загінуў камандзір роты беларускага батальёна імя Кастуся Каліноўскага Павел "Волат". Ён ваяваў за Украіну з 2016 года.
"Смерць любога беларуса — велізарная трагедыя для ўсіх нас, — піша Ціханоўская. — ...Мае шчырыя спачуванні яго родным, блізкім, сябрам і пабрацімам".
Святлана Ціханоўская нагадвае, што сёлета ў баях за Украіну загінулі ўжо шэсць беларусаў. "Усе яны — героі, а героі назаўжды застаюцца ў памяці людзей", — адзначае палітык.
Раней у баях за Украіну загінулі байцы беларускага батальёна імя Кастуся Каліноўскага Ілля Хрэнаў ("Ліцьвін") і Зміцер Апанасовіч ("Тэрор"). Яшчэ трое загінулых беларусаў служылі ва ўкраінскіх падраздзяленнях: Зміцер Рубашэўскі ("Ганс"), Аляксей Скобля ("Тур") і Канстанцін Дзюбайла ("Фенікс"). Скобля служыў у элітным ўкраінскім спецпадраздзяленні, пасмяротна ён узнагароджаны зоркай Героя Украіны.
Каб сачыць за галоўнымі навінамі, падпішыцеся на канал Еўрарадыё ў Telegram.
Мы штодня публікуем відэа пра жыццё ў Беларусі на Youtube-канале. Падпісацца можна тут.