Спецназавец, які прызнаўся ў палітычных забойствах, просіць прытулак у Швейцарыі

Гараўскі кажа, што нават у Швейцарыі баіцца, што да яго прыедуць забойцы з Беларусі. "Пасля таго, як мы забілі гэтых людзей, я ўсе гэтыя гады баяўся, што нас пачнуць па адным альбо ліквідаваць, альбо саджаць. Я і цяпер не выключаю, што прыедуць мяне забіваць. Але ўсё-ткі тут ёсць шанцы выжыць", — прызнаецца ён.

41-гадовы Гараўскі трапіў у Швейцарыю ў кастрычніку 2018 года. Рашэнне наконт прадастаўлення яму прытулку ў Швейцарыі пакуль не прынята.

У рэзанансным інтэрв'ю, якое выйшла ў снежні 2019 года, Гараўскі заявіў, што ўдзельнічаў у выкраданнях і забойствах апазіцыйных палітыкаў у Беларусі. Ён прызнаўся, што апазіцыянераў выкрадалі байцы САХР, у ліку якіх быў і ён сам. Кіраваў выкраданнямі, па словах байца, падпалкоўнік Дзмітрый Паўлічэнка. Былы спецназавец заявіў, быццам Паўлічэнка сам застрэліў апазіцыянераў.

Цела экс-кіраўніка МУС Юрыя Захаранкі, па словах Гараўскага, было спаленае ў крэматорыі на Паўночных могілках у Мінску. Целы Віктара Ганчара і Анатоля Красоўскага нібыта закапаныя ля базы САХР пад Бягомлем. 

Пасля інтэрв'ю Гараўскага Следчы камітэт аднавіў расследаванне спраў аб знікненні Захаранкі, Ганчара і Красоўскага да 18 лютага 2020 года.