Спажыўцы не вывучылі стары закон — ім рыхтуюць новы
Напярэдадні Сусветнага Дня правоў спажыўцоў
Міністэрства гандлю Беларусі паспрабавала ўнесці карэктывы ў Закон “Аб абароне
правоў спажыўцоў”, падрыхтаваўшы праект зменаў і дадаткаў да яго.
Узнікненне гэтага праекту не значыць, што стары
закон дрэнны, лічыць начальнік Упраўлення абароны правоў спажыўцоў і кантролю
за рэкламай Міністэрства гандлю Беларусі Ірына Барышнікава:
“Закон працуе ўжо чатыры гады. Натуральна, практыка
паказвае, што нейкія моманты не ўлічаныя. Ды й жыццё ж не стаіць на месцы. У
нас з’яўляюцца новыя паслугі: тыя ж Інтэрнэт-крамы. І вядома, гэта патрабуе пэўных
карэктываў у заканадаўства”.
Так, пры набыцці тавару праз Інтэрнэт ці іншым дыстанцыйным
спосабам прадавец абавязаны праінфармаваць пакупніка наконт тавару: асноўныя
ўласцівасці, умовы карыстання, пакупкі, дастаўкі, цане, тэрмінах захавання і
годнасці тавару.
Цяпер рэалізацыя харчовых тавараў пры сканчэнні
тэрміну захоўвання забароненая. Аднак вытворцы і пастаўшчыкі настойваюць на
тым, каб гэтую забарону зняць. Бо сканчэнне тэрміну захоўвання яшчэ не значыць,
што прадукт нельга ўжываць, — ён толькі згубіў некаторыя якасці.
А вось рэалізатары не вераць, што такое магчыма. У
гіпермаркеце “Bigzz”, да прыкладу, упэўненыя, што так і будуць вяртаць пратэрмінаваны тавар
пастаўшчыкам:
“За
дзень да сканчэння тэрміну такія тавары мы вяртаем пастаўшчыку. Гэта абумоўлена
кантрактам. Магчыма, будзе пэўная градацыя ў тэрмінах захоўвання. Але асятрыны
другой свежасці не бывае. Гэта яшчэ Міхаіл Булгакаў сказаў”.
Па новым законе гарантыйная майстэрня павінна
несці адказнасць за парушэнне тэрміну рамонту. А тэрміны гарантыі тавараў
замежнай вытворчасці будуць такімі ж, як і ў беларускай.
Сёння адказнасць за
якасць імпартнага тавару нясе толькі прадавец і вытворца. Будуць жа адказваць
імпарцёры, афіцыйныя прадстаўнікі і дылеры.
Верагодна, што для таго, каб пакрыць страты,
пакупнік павінен будзе заявіць памер тых самых стратаў. Гэта значыць — падаць
чэк. Бо даказаць, што пакупка была зроблена менавіта ў гэтага прадаўца, бывае
вельмі цяжка.
У Міністэрстве гандлю выказваюць спадзяванне, што
новы закон спросціць жыццё спажыўцам. Такім чынам, верагодна, і працу самога Міністэрства.
Гаворыць Ірына Барышнікава:
“У
нас у мінулым годзе было каля 150 зваротаў грамадзянаў у Міністэрства гандлю.
Гэта і аказанне дапамогі і пакрыццё стратаў пры няякасных паслугах па
вытворчасці і мантажу вокнаў, былі звароты па пакупцы няякасных мабільных
тэлефонаў, маса зваротаў тычыцца якасці абутку...
Мы кажам аб праекце, то бок,
увойдуць гэтыя нормы ў закон ці не — пакуль не вядома. Мы, канечне, спадзяемся, што ўвойдуць усе, таму што на
сёння яны вельмі актуальныя для абароны правоў спажыўцоў ”.
Хочацца верыць, што Міністэрства гандлю працуе
недарэмна. І спажыўцы ўсё ж такі вывучаць новы закон, які для іх распрацавалі.
