СК пачаў крымінальную справу пасля збіцця жанчыны ў аддзяленні міліцыі

Следчы камітэт пачаў крымінальную справу па выніках праверкі інфармацыі аб збіцці 58-гадовай магіляўчанкі ў аддзяленні міліцыі. Афіцыйны прадстаўнік УСК па Магілёўскай вобласці Аксана Салянюк расказала БелаПАН, што справа расследуецца па ч. 1 арт. 149 КК — наўмыснае прычыненне менш цяжкіх цялесных пашкоджанняў.

"Падставай для крымінальнай справы з'яўляецца доўгае растройства здароўя пацярпелай", — гавораць у Следчым камітэце.

Падчас праверкі былі апытаныя супрацоўнікі Ленінскага РАУС, магілёўскага ІЧУ, Магілёўскай абласной бальніцы, куды пасля затрымання трапіла пацярпелая.

Магіляўчанка кажа, што была збітая ў міліцыі пасля таго, як прыйшла скардзіцца на свайго зяця. Па версіі пацярпелай, яе затрымалі па падазрэнні ў дробным хуліганстве, а потым збіў дзяжурны міліцыянт, які "ў парыве ўсплёску негатыўных эмоцый" нанёс жанчыне ўдары нагой па назе і рукой па галаве. У выніку затрыманая атрымала пералом сківіцы з двух бакоў.

У сваю чаргу начальнік Ленінскага РАУС Аляксандр Маскалёў заявіў, што камеры відэаназірання ў будынку райаддзела не зафіксавалі збіцця пенсіянеркі.

Апошнія навіны

Галоўнае

Выбар рэдакцыі