Што перашкаджае Лукашэнку самому запрасіць сябе на саміт у Вільню?

Да канца кастрычніка Аляксандру Лукашэнку прывязуць запрашэнне на віленскі саміт Усходняга партнёрства. Кур’ерам будзе міністр замежных спраў Літвы Лінас Лінкявічус. Праўда, удакладняе палітолаг Віленскага ўніверсітэта Віціс Юрконіс, імя кіраўніка Беларусі ў тым запрашэнні не будзе.

Віціс Юрконіс: “Гэта запрашэнне не для Лукашэнкі персанальна, а для Беларусі”.

І прыгадвае пражскі саміт Усходняга партнёрства 2009 года. Запрашэнне на яго таксама тагачасны міністр замежных спраў Чэхіі Карэл Шварцэнберг перадаў асабіста ў рукі беларускаму кіраўніку, але з умовай, што той у Прагу не паедзе.

Але калі радок у запрашэнні пусты, то нічога не замінае Аляксандру Лукашэнка ўпісаць туды імя Аляксандра Лукашэнкі! А таму — спакойна даехаць да Вільні, лічыць эксперт Фінскага інстытута замежных спраў Аркадзь Мошас.

Аркадзь Мошас: “Мяркую, калі ён збярэцца ды паедзе, то на мяжы яго не завярнуць. Але адчуваць сябе на гэтым саміце ён будзе не вельмі ўтульна”.

Хаця б таму, дадае дырэктар дэпартаменту Цэнтральнай і Усходняй Еўропы Фонду Маршала Ёрг Форбрыг, што, даведаўшыся пра такі намер беларускага лідара, шэраг кіраўнікоў еўрапейскіх краін адмянілі б сваю паездку ў Вільню.

Ёрг Форбрыг: “Відавочна, што ў такім выпадку некалькі іншых еўрапейскіх лідараў проста не паедуць у Вільню. Я не магу сабе ўявіць сітуацыю, калі Ангела Меркель прысутнічае на адной сустрэчы з Лукашэнкам — гэта проста немагчыма!”

Менавіта таму, сцвярджаюць суразмоўцы Еўрарадыё, з беларускім бокам па дыпламатычных каналах рашэнні наконт асобы прадстаўніка Беларусі на саміце былі загадзя ўзгодненыя. Парушаць іх — нарывацца на непрыемнасці, упэўнены кіраўнік Цэнтра еўрапейскай трансфармацыі Андрэй Ягораў.

Андрэй Ягораў: “На неадэкватныя парушэнні дамоўленасцяў могуць быць неадэкватныя дзеянні з боку той краіны, у якую ён трапляе. Самы просты варыянт у гэтым сэнсе, што Лукашэнку могуць дэпартаваць з Літвы. Ён так ці інакш прыбудзе ў аэрапорт і яго могуць не выпусціць з аэрапорта ці нешта накшталт таго”.

Дый сэнсу ў такім “прарыве” беларускага лідара на саміт Аркадзь Мошас не бачыць.

Аркадзь Мошас: “Галоўнае зараз для рэжыму — знайсці такія кропкі сутыкнення з Еўрасаюзам, каб гэта мела эканамічны сэнс. Усё, што зараз робіцца для наладжвання ўзаемадзеяння з ЕС, толькі і робіцца, што для паляпшэння эканамічных узаемаадносінаў. А проста прыехаць і нешта там у паветра сказаць — я логікі ў гэтым не бачу. Так, напэўна, будуць пяць хвілін славы — і ўсё!”

Кропку ў спрэчцы ставіць Віціс Юрконіс.

Віціс Юрконіс: “Як імя, так і знешнасць Аляксандра Лукашэнкі ведае большасць літоўскіх памежнікаў. А рашэнне Еўрасаюза наконт яго ёсць...”

Тым не менш усе пагаджаюцца, што нават факт спробы прыезду беларускага кіраўніка на саміт у Вільню стаў бы вялікім скандалам. Праўда, ні самому Лукашэнку, ні Беларусі, ні еўрапейска-беларускім стасункам ён на карысць не пайшоў бы. Не дапамагла б нават правераная забава — прэс-канферэнцыя для замежных СМІ. Іх хоць і шмат будзе на саміце ў Вільні, але пайсці на “непратакольнае” мерапрыемства мала хто асмеліцца — больш на еўрасустрэчы не запросяць!