За "заклікі да эканамічных санкцый" штрафуюць на 2 мільёны рублёў
Менавіта на такую суму аштрафавалі экс-кандыдата ў прэзідэнты, былога палітвязня Дзмітрыя Уса.
Мяркуецца, што пастанова была вынесеная завочна. 24 ліпеня Ус быў праінфармаваны Ленінскім раённым судом сталіцы пра штраф "за заклікі да эканамічных санкцый" , які мусіць заплаціць, інфармуе "Наша ніва".
Нагадаем, вясной Дзмітрый Ус двойчы звяртаўся ў пытанні санкцый супраць кіраўніцтва Беларусі да Еўрасаюза. Ён лічыў, што санкцыі прывядуць да жорсткіх і хуткіх эканамічных і палітычных рэформаў, зменаў у сферы правоў чалавека і лібералізацыі Выбарчага кодэкса.
У траўні за заклікі да санкцый быў аштрафаваны на 500 тысяч рублёў палітык Віктар Івашкевіч.
Фота — belsat.eu
