З мікашэвіцкага "Граніту" звольнілі прафсаюзнага актывіста
Намеснік старшыні суполкі Беларускага незалежнага прафсаюзу Мікалай Карышаў застаўся без працы — у сувязі з заканчэннем кантракту.
Яго паплечнікі па прафсаюзе называюць гэтую справу палітычна матываванай і збіраюцца судзіцца, перадае Радыё "Свабода". Судзіцца мяркуе і сам актывіст.
Пра тое, што кантракт не будзе працягнуты, Карышава папярэдзілі за месяц. 5 траўня, калі актывіст прыйшоў на працу, яму сказалі, што начальства загадала на працоўнае месца яго не дапускаць. Па словах Карышава, яго не азнаёмілі з загадам аб звальненні і не аддалі працоўную кніжку.
Сакратар незалежнага прафсаюзу на "Граніце", юрыст па адукацыі Анатоль Літвінка кажа, што каб звольніць, супраць Карышава сфабрыкавалі дысцыплінарныя спагнанні. А яны з'яўляюцца падставай, каб не працягваць кантракт.
Фота — svaboda.org