З клінік Мінска выпісаны 13 пацярпелых ад выбуху
Па дадзеных на 14 красавіка ў лякарнях знаходзяцца 160 чалавек. З іх у цяжкім стане - 27, сярэдняй ступені цяжкасці - 34, лёгкай ступені - 99.
Усе пацыенты атрымліваюць неабходную медыцынскую дапамогу ў поўным аб'ёме. Для паўнавартаснага дынамічнага назірання за пацярпелымі ў начны час у лякарнях узмоцнены брыгады дзяжурных лекараў. Ва ўсіх лячэбных установах маецца дастатковы запас перавязачнага матэрыялу і медыкаментаў, донарскай крыві. Арганізавана кругласутачнае дзяжурства персанала на аптэчных складах для аператыўнага папаўнення лякарняў неабходнымі лекамі.
Забяспечваецца псіхалагічная падтрымка пацярпелых і іх блізкіх ва ўсіх установах аховы здароўя. Для атрымання інфармацыі пра стан пацыентаў працягваюць працу тэлефоны гарачай лініі, паведамляе БЕЛТА.
