Вышыню будынкаў у гістарычным Мінску абмежавалі 11 і 26 метрамі
Амаль 80 гектараў Мінска цяпер маюць статус гістарычнага цэнтра.
Тут забаронена будаваць хмарачосы, большыя за будынкі XVI-XX стагоддзяў. Гэта добрая навіна. Але ўжо дазволеныя праекты на гэтай тэрыторыі дабудуюць.
“Гэтыя рашэнні прынятыя раней, — тлумачаць Еўрарадыё ў Мінкульце. — Хаця некаторыя будынкі дэсануючыя. Таму трэба будзе выпрацоўваць мерапрыемствы па іх адаптацыі”.
"Рашэнне дэкларатыўнае", — адразу кажа Антон Астаповіч, старшыня Таварыства аховы помнікаў гісторыі і культуры.
“З 2007 года я звяртаўся ва ўсе інстанцыі і падымаў такую праблему. Тое, што гэта з’явілася зараз, — добра. Няма гарантыі, што рэгламенты будуць выконвацца, бо ў старым цэнтру Мінска налева і направа парушаюцца рэгламенты дэтальнага плану. І гэта ідзе з санкцыі Міністэрства культуры”, — тлумачыць эксперт і дадае, што парушэнняў усё адно менш не стане.
Выпраўляемся ў гістарычны цэнтр з прадстаўніком архітэктурнай секцыі Таварыства аховы помнікаў Андрэем Лары, спрабуем ацаніць "гістарычнасць" тамтэйшых новабудоўляў.
На вуліцы Вызвалення ў Ракаўскім прадмесці Андрэй спыняецца ля будынка праваслаўнай епархіі.
Будынак праваслаўнай епархіі
Андрэй Лары: “Будынак вышэйшы за ўсе астатнія, і стаіць сам па сабе, не ў фронце забудовы. А ў канцы вуліцы стаяла раней Васкрасенская царква, няхай бы яе лепей адбудавалі”.
Па вуліцы Вызвалення выходзім да новай будоўлі — узводзяць дзевяціпавярховы гандлёва-забаўляльны цэнтр. Сценаў яшчэ няма, а паверхаў плануюць 8 ці 9.
Далей направа — помнік сучаснасці, стометровы слупок па праспекце Пераможцаў. Дабудоўваецца…
Высотка на праспекце Пераможцаў
“Самае жудаснае ў гэтай сітуацыі, што з такімі аб’ёмамі ніколі не знойдзецца сродкаў, каб гэта знесці і пабудаваць нешта іншае, меншага памеру”, — заўважае Андрэй Лары.
У Верхнім горадзе таксама сюрпрызы — новабудоўля па вуліцы Энгельса для грамадска-бытавых патрэбаў выбіваецца з агульнага плану на вышыні. І хоць Мінкульт спыніў яе будаўніцтва, унутры… працуе рабочы.
“Усё адно яго ўвесь не зруйнуюць. Ім зараз умову паставілі — здымаць паверхі. Паводле старога дэтальнага плану тут мусіць быць забудова не болей за два паверхі”, — гаворыць Андрэй Лары.
Гістарычны цэнтр, згодна з новым праектам зон аховы, будзе ў кварталах паміж Інтэрнацыянальнай і праспектам Незалежнасці, а таксама ўздоўж вуліц Раманаўская Слабада і Янкі Купалы. Вышыня новых будынкаў па праспекце Незалежнасці цяпер мусіць быць не болей 26 метраў, па Інтэрнацыянальнай — не больш за 11 метраў.
На галоўным фота: Вуліца Гандлёвая ў 1950-я гады, сучасны хмарачос на Пераможцаў
Фота будынка епархіі: ctv.by