Удзельнікі памінання ахвяраў сталінізму заклікалі падтрымаць палітвязняў
У памінанні, якое праводзіцца кожны месяц 29-га дня, бралі ўдзел 15 чалавек, за якімі назіралі шэсць супрацоўнікаў МУС і КДБ.
Выказаць салідарнасць з палітзняволенымі падчас судоў над імі заклікалі грамадзян удзельнікі памінання ахвяраў сталінізму, што прайшло ва ўрочышчы Курапаты 28 лютага, паведамляе БелаПАН.
Пра гэта, у прыватнасці, заявіў старшыня аб'яднання "Маладая Беларусь" Зміцер Каспяровіч. Паводле яго слоў, такая салідарнасць важная для палітзняволеных. Як мяркуе Каспяровіч, беларускія ўлады з'яўляюцца ідэйнымі спадчыннікамі сталінскага рэжыму, спрабуючы пасеяць у грамадстве атмасферу страху. Ён назваў "вельмі мужным" учынак былога кандыдата ў прэзідэнты Алеся Міхалевіча, які распавёў грамадству пра катаванні ў засценках КДБ, каб схіліць зняволеных да супрацоўніцтва са спецслужбамі.
Галіна Сіўчык, маці палітыка Вячаслава Сіўчыка, які знаходзіцца зараз у эміграцыі, лічыць, што бязвінныя ахвяры Курапатаў нават не разумелі, за што іх забіваюць. "І мы не разумеем, за што сядзяць у няволі людзі, якія хацелі ўдзельнічаць у выбарах", — сказала Сіўчык
Удзельнікі памінання пад бел-чырвона-белым сцягам усклалі кветкі да памятных знакаў, запалілі лампады, ушанавалі хвілінай маўчання памяць ахвяраў таталітарызму, ажыццявілі малебны за цяперашніх беларускіх палітзняволеных, выканалі гімн "Магутны Божа".