Удзельнік разагнанага "Батан-паці": Мы не можам адказваць за ўсіх, хто быў

23/11/2012 - 06:31

Квіток на “Батан-паці” на Дзень студэнта, якую разагнаў АМАП, каштаваў да 150 тысяч рублёў. Каб атрымаць квіток, ён жа флаер, трэба было аддаць грошы арганізатарам, а перад гэтым запісацца на вечарыну.

Хлопцы ў строях батанікаў, дзяўчаты апранутыя пад разбэшчаных школьніц і шмат алкаголю. Чым не Дзень студэнта, але адзін з удзельнікаў, Макс, сустрэў на ўваходзе міліцыю.

Вечарына да прыезду міліцыі

Макс: “Да сценкі паставілі. Проста нехта пранёс траву. З сотні чалавек — мы не можам адказваць за ўсіх”.

І запэўнівае, што пра траву нічога не ведаў, а першая “амерыканская вечарына” на Хэлоўін прайшла ўдала.

Макс: “Тады мы паехалі на катэдж. Усе пісалі, давайце яшчэ збяромся. Гэта не “закрытыя вечарыны”, як гаварылася. Проста вялікая кампанія сяброў і знаёмых. Прыйсці можа кожны, хто захоча”.

Нічога дрэннага ў “Батан-паці” не ўбачыў і персанал аздараўляльнага цэнтру “Арляня”, дзе праходзіў нашумелы Дзень студэнта. Наркотыкаў не заўважылі....

“Як трэба вартаўнік там глядзеў, гаварыў з усімі. Там усё нармальна было, прыгожа. А што там наркотыкі будуць, мы не ведалі і ўявіць не маглі”, — расказваюць у аздараўляльным цэнтры.

Вечарына на пачатку

Прыпыняць такія вечарыны студэнты не збіраюцца, а на наступную хочуць запрасіць… міліцыю. І раяць праваахоўнікам найчасцей зазіраць у звычайныя дыскаклубы.

“Усё будзе толькі афіцыйна, няхай лепш на ўваходзе два міліцыянты стаяць, чым пасля іх цэлы аўтобус прыедзе”, — паведамляюць арганізатары на старонцы Вконтакте.

Ва Упраўленні МУС па наркакантролі і супрацьдзеянні гандлю людзьмі Брэсцкай вобласці гавораць, што на дыскатэкі зазіраюць штомесяц:

“За год на дыскатэцы, каб у кагосьці былі наркотыкі, два такія выпадкі па ўсёй вобласці звычайна. Гэта гісторыя ў “Арляняці” — рэдкасць”.

І дадаюць, што з міліцыяй можна дамовіцца, каб праваахоўнікі даглядалі ўсіх, хто прыходзіць на дыскатэку.

У Брэсцкай міліцыі ўжо кажуць пра адну крымінальную справу па матывах той студэнцкай вечарыны:

“…Бо экспертыза гатовая толькі па адным факце, пакуль. Гэта за захоўванне і збыт наркотыкаў. Бо пры асабістым даглядзе там былі знойдзеныя наркатычныя сродкі”.

Падазраваны ў незаконным абарачэнні наркотыкаў — беспрацоўны 23-гадовы жыхар Брэста. У яго ў кішэні знайшлі амаль 2 грамы гашышу.

Паводле міліцыі, шэсць удзельнікаў вечарыны “Батан-паці” ўжывалі наркотыкі. Усяго на дыскатэцы было блізу сотні чалавек. Большая частка — студэнты.