У Варшаве зладзілі экскурсію па каналізацыях (фота)
У ноч на 20 траўня ў польскай сталіцы адбылася культурная імпрэза Ноч Музеяў.
Жыхары і госці горада змаглі наведаць болей за 180 культурных пляцовак. Апроч музеяў да імпрэзы далучыліся і навучальныя установы, шматлікія галерэі, бібліятэкі, кінатэатры, дыпламатычныя пляцоўкі, навуковыя цэнтры, рэлігійныя асяродкі, дзяржаўныя ўстановы, кавярні, клубы. Між іншага, можна было здзейсніць шпацыр па варшаўскіх водных фільтрах — такую магчымасць дало гарадское Прадпрыемства Водаправодаў, Каналізацыі і Станцыі фільтраў.
Наведнікі Воднай станцыі ў часе экскурсіі маглі ўбачыць воданапорную вежу, водаправодны музей, павольны фільтр з 1886 года і многія іншыя цікавосткі.
Варта дадаць, што прэзідэнт Польшчы Браніслаў Камароўскі 2 лютага 2012 года выдаў распараджэнне аб прызнанні станцыі гістарычным помнікам. Гэтае збудаванне служыць варшавякам болей за 125 гадоў. Упершыню вада з фільтраў пацякла ў 1886 годзе, станцыя ўзнікла дзякуючы намаганням кіраўніка горада, расійскага генерал-губернатара Сакрата Старынкевіча. Праект пабудовы водаправодаў і каналізацыі для Варшавы распрацаваў у 1876 годзе англійскі інжынер Уільям Ліндлей.
У ноч музеяў аб’ект наведала болей за 700 чалавек. Каб патрапіць на экскурсію некаторым жадаючым прыйшлося прастаяць у чарзе па 5 гадзінаў.
