У КДБ пачалі выклікаць відавочцаў падзеяў выбуху
Студэнт Максім Леў быў на месцы здарэння адразу пасля выбуху і да самага вечара. Сёння з гэтай нагоды яго выклікалі ў КДБ.
"Думаю, што гэта правільна. Бо я мог нешта бачыць ці ведаць. А паколькі вядзецца следства, то лічу лагічным дапытаць усіх, хто там быў", — распавеў Еўрарадыё Максім.
Увечары 11 красавіка юнак быў ля плошчы Незалежнасці. Калі пабачыў, што да станцыі метро "Кастрычніцкая" едуць хуткія і пажарныя машыны, адразу пабег туды. З месца падзеяў ён асвятляў сітуацыю ў Твітэры.
Следчага КДБ цікавіла, што юнак бачыў каля метро, а таксама якім чынам можна супрацьстаяць чуткам, якія распаўсюджваюцца праз сацыяльныя сеткі. Максім прапанаваў стварыць агульны Твітэр па гэтай справе, куды можна даваць афіцыйную інфармацыю. Следчы прыняў гэта да ўвагі.
Фота: http://svobodaslova.by/
