У “Аканы” і швейцарскага бэнда з’явіўся сумесны дыск
Праўда, ён не прадаецца ў мінскіх крамах і яго нельга спампаваць з Інтэрнэта. Ва ўсім вінаватыя аўтарскія правы.
Вакальнае трыа “Акана” мае дзве добрыя навіны. Яны тычацца сумеснага праекту KAZALPIN, які “Акана” робіць разам са швейцарскім бэндам Albin Brun Alpin Ensemble. Па-першае, пасля двухгадовай працы на нямецкім лэйбле Сhallengerecords у музыкаў выйшаў альбом. Па-другое, праект выпраўляецца на гастролі ў падтрымку пласцінкі. За падрабязнасцямі Еўрарадыё накіравалася на рэпетыцыю дзявочага трыа, якое ўжо 10 лістапада чакаюць у швейцарскім Люцэрне.
Руся: Ну вось менавіта сёння мы сабраліся на рэпетыцыю, каб аднавіць адну з песень, якая называецца “Гарэла сосна”. Таксама мы яе павязем зараз у Швейцарыю на рэпетыцыі і будзем рыхтаваць да беларускага і да швейцарскага тураў.
Еўрарадыё: А колькі ў вас будзе там часу на рэпетыцыі?
Ірэна Катвіцкая: 5 дзён, а потым будзе гастрольны тур. Вось за 5 дзён мы павінны прыйсці ў форму (смяюцца).
Прэзентацыя альбома праекту KAZALPIN адбудзецца ў васьмі швейцарскіх і чатырох беларускіх гарадах. Ужо зараз жыхары Еўропы з задавальненнем набываюць і слухаюць дыск “KAZALPIN”. Ці атрымаюць такую магчымасць беларусы, пакуль не вядома - замежныя лэйблы вельмі сур’ёзна абараняюць свае аўтарскія правы. Па гэтай жа прычыне альбом не будзе выкладзены ў Сеціве.
Руся: “Цяпер мы вядзем перамовы з West-Records на гэты конт. Але нам вельмі цяжка дамовіцца са швейцарскім і нямецкім бокам, бо яны вельмі хвалююцца за капірайты і за аўтарскія правы. А як вы ведаеце, на Беларусі з аховай аўтарскіх правоў працаваць даволі складана. Таму на дадзены момант мы не ўпэўненыя, што зможам дамовіцца. Вельмі б хацелася зрабіць невялікі тыраж, каб ён прадаваўся ў беларускіх крамах таксама”.
“Акана” называе дыск “KAZALPIN” першым у гісторыі беларускай музыкі інтэрнацыянальным этна-джазавым альбомам. З такім стылістычным вызначэннем пласцінкі згодныя і прадстаўнікі лэйбла Сhallengerecords. Праўда, робіць рэмарку Руся, ёсць тут і нюансы.
Руся: “Джаз Albin Brun Alpin Ensemble – гэта не класічны джаз. Там ёсць шмат месца для імправізацыі, для аўтарскіх вынаходніцтваў. Гэта сучасны джаз з элементамі альпійскіх народных мелодый.
Ірэна Катвіцкая грунтоўна прэзентуе змест пласцінкі.
Ірэна Катвіцкая: “У альбоме ёсць тры стылістычныя буйныя пласты. Будзе прадстаўленая беларуская аўтэнтыка, арыгінальныя інструментальны кампазіцыі Альбіна і тое, што мы назвалі нашым сумесным праектам – наша ядро – сумесныя аранжыроўкі і этна-джазавыя кампазіцыі”.
На жаль, усе міжнародныя праекты аднойчы завяршаюцца. Пакуль не вядома, ці ёсць будучыня ў праекту KAZALPIN, аднак музыкі спадзяюцца што-небудзь для гэтага прыдумаць.
Руся: “Вядома, не хацелася б на гэтым спыняцца, маўляў, зніклі фонды, і знік KAZALPIN. Вядома, што мы будзем спрабаваць прадаваць гэты праект на нейкія фестывалі. І спадзяюся, што мы здолеем знайсці новае фінансаванне, бо, насамрэч, гэта новае слова як для беларуская музыкі, так і для швейцарскай сучаснай музыкі”.
Беларускі тур KAZALPIN пачнецца 30 лістапада выступам у Мінску. На канцэрты праекту могуць трапіць і нават патусіць з музыкамі і слухачы Еўрарадыё. Зусім хутка на сайце www.euroradio.fm стартуе конкурс! Таксама ў бліжэйшую пятніцу слухайце нашу Перадачу-Аглядачу, дзе Еўрарадыё выступіць апанентам прыхільнікам тэрміну “этна-джаз” у дачыненні да праекту KAZALPIN.
Фота Еўрарадыё і з архіваў гурта