Сяргей Міхалок: "Новы альбом каштаваў мне двух запояў!"
Лідар "Ляпісаў" назваў "Весёлые картинки" дыскам сваіх сноў, перажыванняў і успамінаў, і ўвогуле альбомам, якога ад гурта не чакалі.
У віцебскай "Энергіі" адбылася прэзентацыя новага альбома гурта "Ляпис Трубецкой" "Весёлые картинки". Гэта чацвёрты канцэрт гурта ў беларускім туры ў падтрымку новага альбома пасля Ліды, Гродна і Брэста. Еўрарадыё не ўпусціла магчымасці аднымі з першых паслухаць новую праграму і накіравалася ў "паўночную сталіцу" следам за носьбітам народнай свабоды Сяргеем Міхалком.
"На разагрэве" у беларускім туры "Ляпісаў" грае брэсцкі гурт "ДАЙ ДАРОГУ!". Іх сэт і распачаў канцэрт. Выступ "Ляпісаў" стартаваў новай песняй "Overture", якая прагучала ў запісе пад відэа-шэраг на экране. Пасля на сцэне з’явіліся і самі музыканты. Публіка прымала новыя песні з энтузіязмам, і падхопліваючы радкі прыпеву, энергічна падпявала "Ляпісам".
Па словах Сяргея Міхалка, новы альбом прынцыпова адрозніваецца ад трох папярэдніх дыскаў "Ляпісаў" — "Капитала", "Manifestа" і "Культпросвета".
Сяргей Міхалок: "Я магу адразу сказаць — гэты альбом крыху камерны і нават інтымны. "Весёлые картинки" каштавалі мне двух запояў. Для мяне гэта вельмі шмат! За апошнія 8 гадоў у мяне было 2 запоі, і гэтыя 2 запоі падчас запісу гэтага альбома. У гэтым альбоме вельмі шмат маіх сноў, маіх успамінаў. Асабіста маіх! Пахаў, адчуванняў, людзей, з якімі я калі-небудзь сустракаўся. Нейкіх перажыванняў. Для мяне гэта ўвогуле НО-ВА-Е".
Ужо па традыцыі паміж песнямі Міхалок чытаў вершы ў духу Маякоўскага, звяртаючыся як да творчасці вядомых паэтаў, так і да самага загадкавага "ўдзельніка" канцэртаў "Ляпісаў" — Юзіка Кілевіча, ператвараючы іх у своеасаблівыя эпіграфы да кожнай кампазіцыі.
Праграма канцэрту складалася з "рознафарматных" кампазіцый у асноўным трох апошніх альбомаў. "Весёлые картинки" былі прадстаўленыя сямю песнямі з дванаццаці — "Overture" (у якой музыканты заклікаюць уявіць сябе чароўнымі сняжынкамі), "Зевс" (старажытнагрэчаскае фэнтазі пра маральнае людажэрства), "Я верю" (гімн светлай будучыні), "Африка" (ужо вядомы кавер расійскага рэгі-гурта "Комитет Охраны Тепла"), "Грай", "Священный Огонь" і каверам на вядомую "Зоопарк" Ягора Летава, якая таксама ўвайшла ў альбом.
Падчас прэс-канферэнцыі, якая адбылася адразу пасля канцэрту, Сяргей падкрэсліў адрозненні ў стварэнні папярэдняга альбома "Культпросвет" і працы над дыскам "Весёлые картинки".
Сяргей Міхалок: "Як перадаць уздыхі? Як перадаць, ну не ведаю, святло з вакна палаты шпіталя? Усе гэтыя рэчы, якія я начыста абрубаў падчас стварэння агіт-попа. Агіт-поп — гэта мануфактурная праца. Гэта праца, як я яе называю, анарха-сіндыката. У агіт-попе не працаваў адзіночка. Было шмат людзей, каб гэта выглядала маналітам. І нашы, ляпісаўскія, выступы былі маналітнымі.
У гэтым альбоме шмат музычных метафар. Шмат мелодый, шмат гуку. Гэта такі art of noise — то бок у ім вельмі шмат гукаў. У "Культпросвете" не было гукаў, у ім былі думкі і ідэі. Каб усё выглядала, нібыта гэта вырублена сякерай. Ніякіх гітарак, нічога не было! Гэта была дакладная канцэптуальная рэч, дзе мы прыбіралі ўсё лішняе — эківокі, псіхалагізмы".
Амаль усе вакальныя партыі на новым альбоме належаць Міхалку. Падчас адной з новых песень — "Я верю" — другі вакаліст "Ляпісаў" Павел Булатнікаў увогуле сыходзіць са сцэны.
Сяргей Міхалок: "Гэты альбом — пачуццёвы. Таму ў гэтым альбоме я ў асноўным спяваю сам. Таму што гэтыя рэчы – не эстафетная палачка. Гэта зусім не азначае, што мы з Паўлам пасварыліся ці што-небудзь такое. У наступным альбоме Павел праспявае 5 ці 6 песень, абяцаю вам.
Тут ёсць гук. Ёсць месца для гука. Вось, напрыклад, песня "Грай" — у ёй вельмі шмат гукаў. Ты чуеш гукі купалаўскай ночы, чуеш шоргат чароту. Ты чуеш тое, што прызначаецца толькі табе. Гэта рэчы, якія тычацца гэтага інтымнага, сакральнага свету, свету сноў. У гэтым альбоме менавіта гэтага шмат. Сны, адчуванні, пахі, сентыментальнасць — рэчы, якіх ад нас не чакалі".
Ды і ўвогуле, дадае Міхалок, такога альбома ад гурта не чакалі зусім!
Сяргей Міхалок: "Ад нас ужо чакалі такога выразнага "рубілава", алімпійскага. Выразныя сродкі, а не выразныя магчымасці, пераважаюць у гэтым альбоме над дакладнымі ісцінамі і перакананнямі. Я гэты альбом называю альбомам пытанняў, якіх у мяне вельмі шмат. Я хачу быць "почемучкой". Мне 40 гадоў, а я не ведаю амаль што ніводнага адказу, я ўвесь час сумняваюся. І мне не сорамна ў гэтым прызнацца. Я вельмі баюся людзей з перакананнямі".
Віцебскі выступ "Ляпісаў" працягваўся амаль дзве гадзіны. Музыканты праспявалі фінішную "Харэ" і сышлі са сцэны. Але гледачы і не думалі разыходзіцца, і пасля невялічкай паўзы музыканты зноўку з’явіліся на сцэне і выканалі яшчэ тры песні "на біс".
Нагадаем, што новы альбом "Ляпісаў" "Весёлые картинки" выйдзе ў сакавіку, а канцэртныя прэзентацыі ў Мінску адбудуцца 1-га і 2-га красавіка ў клубе "Рэактар".
Фота: Наталля Чаркесава