Старшы трэнер зборнай па веласпорце адказаў за правал на чэмпіянаце
Нагадаем, што на нядаўнім чэмпіянаце свету па веласіпедным спорце на велатрэку наша каманда не заваявала ніводнай узнагароды.
27 лютага прайшло паседжанне выканкама Беларускай федэрацыі роварнага спорту. На ім заслухалі справаздачу старшага трэнера нацыянальнай каманды Станіслава Салаўёва.
У выніку дыскусіі выступ нацыянальнай зборнай на чэмпіянаце свету прызналі нездавальняючым. Выканкам федэрацыі звярнуўся да кіраўніцтва Міністэрства спорту і турызму з хадайніцтвам пра скасаванне кантракту з расійскім трэнерам. Сёння ж міністр Аляксандр Шамко падпісаў загад пра звальненне Салаўёва з пасады.
Як паведамляе БЕЛТА, апошнія гады працы ў зборнай Беларусі Салаўёў увесь час канфліктаваў са спартоўцамі і трэнерамі, а таксама з кіраўніцтвам веладрома "Мінск-Арэны".
Фота — ctv.by
