Праз 1,5 года КДБ вярнуў Лябедзьку канфіскаваныя 10 тысяч долараў

Грошы былі канфіскаваныя ў снежні 2010 года падчас ператрусу ў кватэры Анатоля Лябедзькі. Па словах палітыка, калі яго крымінальную справу вырашылі спыніць, ён неаднаразова звяртаўся і ў КДБ, і ў Следчы камітэт з патрабаваннем вярнуць канфіскаваныя грошы ды носьбіты інфармацыі. Але справа зрушылася з месца толькі цяпер.

Анатоль Лябедзька: “Мне патэлефанавалі і сказалі, што магу прыйсці. У пятніцу я быў у іх (КДБ. — Еўрарадыё), у аддзеле прапускоў. Зайшлі чатыры чалавекі, адзін з відэакамерай. Я сказаў: “Што тут за шоў з камерай?” Яны кажуць: “Калі вы супраць, то мы не будзем”. Яны камеру выключылі, я запоўніў розныя паперкі. Яны глядзелі, каб там вельмі дакладна ўсё было. І на падставе рашэння аб спыненні крымінальнай справы ў адносінах мяне яны гэтыя грошы вярнулі”.

Праўда, без жартаў з боку Лябедзькі не абышлося: палітык пацікавіўся, ці не будзе ў яго з гэтымі грашыма праблем, ці ўсе яны сапраўдныя. І што наконт працэнтаў, якія нараслі за 2 гады, пакуль грошы ляжалі ў "банкаўскай ячэйцы” КДБ. У адказ лідара АГП супакоілі: грошы сапраўдныя, але адсоткаў не будзе. І нічога не адказалі, калі палітыку вярнуць канфіскаваныя носьбіты інфармацыі і дзённікі, што ён вёў у СІЗА КДБ.

У размове з Еўрарадыё палітык адзначыў, што не падлічваў, колькі працэнтаў мог бы займець, калі б гэтыя 10 тысяч долараў ляжалі ў банку. Падлічыла Еўрарадыё: калі пакласці такую суму пад 5% гадавых на тры гады, то агульная сума вяртання з прэміяльнымі склала б 11 777,51 USD.

Фота — bymedia.net