Пратасевіч: Бацькі сказалі, што я магу збіраць свае рэчы
Ужо былога навучэнеца Ліцэя БНТУ Рамана Пратасевіча бацькі выгналі з дому. У эфіры Еўрарадыё ён расказаў, ці знайшоў прытулак і што збіраецца рабіць далей.
Еўрарадыё: Мы ведаем, што выключэнне з ліцэя - гэта не адзіная твая праблема. Раскажы пра сваю сітуацыю.
Пратасевіч: Пасля таго як мяне выключылі з ліцэя, ўсё змянілася. Мае бацькі былі шакаваныя, яны не ведалі, што са мной рабіць. Пачалася зноў спрэчка і бацькі сказалі, што я ўжо вольны, магу сабраць свае рэчы і ісці.
Еўрарадыё: Па-сутнасці, цябе выгналі з дому?
Пратасевіч: Па-сутнасці, так.
Еўрарадыё: Дзе ты цяпер знаходзішся і ці маеш дах над галавой?
Пратасевіч: Знайшліся тыя добрыя людзі, якія далі мне дах над галавой, дзе мяне кормяць, і я ім вельмі ўдзячны. Вядома, не магу не сказаць пра тое, што знайшлося вельмі шмат людзей, якія жадаюць мне дапамагчы.
Еўрарадыё: Гэта твае сябры ці сваякі, як ты знайшоў гэтых людзей?
Пратасевіч: Гэта не толькі мае сваякі, але і з розных нават краін пісалі: і з Германіі, і з Італіі – паўсюль гэта выклікала нейкі шок такі. І ўсе жадаюць дапамагчы і фінансава і з домам. Мне шмат ужо людзей пісалі Укантакце і ў Фэйсбуку з прапановамі дапамогі.
Еўрарадыё: Што ты плануеш рабіць далей? Ці працягнеш вучыцца ў школе?
Пратасевіч: Зараз я толькі выйшаў са школы па месцы жыхарства. Там мяне ўзялі, бо гэта абавязаны былі зрабіць. Зараз ёсць такі варыянт, як пайсці ў ліцэй імя Якуба Коласа. Нават такі плюс ёсць, што я вучыў тры гады польскую мову.
Еўрарадыё: Як твае знаёмыя, сябры ставяцца да тваёй пазіцыі?
Пратасевіч: Усе толькі падтрымліваюць. Я зразумеў, што яны добрыя сябры, бо што б яны не думалі, яны падтрымліваюць, як могуць. Нават спрабуюць неяк словамі падтрымаць мяне.
Нагадаем, што на Рамана Пратасевіча ціснула адміністрацыя ліцэю за яго ўдзел у маўклівых акцыях пратэсту. У выніку навучэнцы выгналі з установы.
