Прагноз вынікаў выбараў ад Еўрарадыё спраўдзіўся на 94%

“Мы не будзем каментаваць выбар выбаршчыкаў. Гэта няўдзячная справа. Калі маеце канкрэтныя пытанні, то задавайце, стаўце. Волевыяўленне выбаршчыкаў? Цалкам магчыма”, — так адказала Лідзія Ярмошына на пытанне Еўрарадыё, чаму ў Беларусі так проста і хутка выбіраюць дэпутатаў, хоць іх выбарчую кампанію вельмі складана назваць актыўнай.

Выбары ў Палату прадстаўнікоў адбыліся ва ўсіх акругах. Абраныя 109 дэпутатаў са 110. Толькі Навабеліцкая акруга Гомеля засталася без свайго прадстаўніка ў парламенце: там сябра ЛДП не здолеў набраць неабходныя 50% плюс адзін голас, а праўладны кандыдат з незразумелых прычынаў зняўся за 5 дзён да выбараў. Ва ўсіх астатніх акругах як мінімум адзін кандыдат набраў больш за 50% галасоў. Гэта пры тым, што ў сусветнай практыцы для палітыка выдатным лічыцца вынік у 35-40% галасоў. Нават Барак Абама перамагае з вынікам крыху большым за 50%.

У чым сакрэт? На начной паслявыбарнай прэс-канферэнцыі Лідзія Ярмошына расказала, што справа ў кандыдатах. А таксама ў нізкім конкурсе.

“Моцныя кандыдаты, насамрэч. Ну, і конкурс у нас быў невялікі — менш за 3 чалавекі на месца. Плюс 16 безальтэрнатыўных акруг”.

Хто ведае, можа і так. Аб прадказальнасці вынікаў выбараў можа сведчыць хаця б прагноз Еўрарадыё, зроблены ў дзень рэгістрацыі кандыдатаў у дэпутаты. Са 110 кандыдатаў мы правільна назвалі прозвішчы 103. Было б больш, калі б не нечаканая адмова ад удзелу ўжо былога дарадцы Лукашэнкі Ігара Пракапенкі, які балатаваўся ў згаданай Навабеліцкай акрузе. Не спраўдзіліся нашы надзеі на галоўнага ўрача 18-й мінскай паліклінікі Вадзіма Касцюкова і намесніка галоўнага ўрача Маладзечанскага раённага шпіталя Таццяну Шамадзі. Іх перамаглі сябра КПБ, дэпутатка Палаты прадстаўнікоў папярэдняга склікання Валянціна Леаненка і дырэктар акцыянернага таварыства “Бярэзінскае” Станіслаў Кулеш.

Аляксандр Цэцоха, супрацоўнік Віцебскага медыцынскага каледжа, перамог Аляксандра Дзядзінкіна, які кіруе навукова-даследчым цэнтрам у Віцебскім універсітэце. Не спраўдзіўся прагноз яшчэ ў трох акругах.

А наогул прагноз Еўрарадыё, зроблены толькі на аснове месца працы кандыдатаў, калі яшчэ нават ні іх біяграфіі, ні звесткі аб прыбытках і маёмасці не былі вядомыя, спраўдзіўся на 94%. Такому выніку могуць пазайздросціць цэлыя аналітычныя інстытуты.