Песня гомельскага Сярогі прагучыць на Канскім фестывалі
Кампазіцыя беларускага блюзмэна стала саўндтрэкам да ўкраінскага фільма “Дняпро”.
Песня “Cold Rain” гомельскага блюзмэна Сяргея Курэка стала галоўным саўндрэкам да ўкраінскага фільма “Дняпро”. Паспрыяў гэтаму вядомы беларускі рэпер Сярога, які і прапанаваў трэк свайго цёзкі рэжысёру стужкі Аляксандру Шапіру. Яму так спадабалася песня, што яе вырашылі зрабіць галоўным саўндтрэкам за два дні да мантажу. Цяпер песню пачуюць і сусветныя зоркі!
Тэкст і музыку напісаў сам Сяргей Курэк напрыканцы 2009 года, а праспяваў яе разам са сваім сябрам, вядомым R&B-выканаўцам Максам Лорэнсам.
"У песні запісаўся мой сябра Макс Лорэнс, а ў яго прадзюсер — Сярога. З ім мы таксама даўно знаёмыя. Сярога паставіў песню рэжысёру Аляксандру Шапіру. Той песняй пранікся настолькі, што за два дні да мантажу фільма паставіў гэты саўндтрэк у самы кульмінацыйны момант фільма".
Прэм'ера фільма адбудзецца на Канскім фестывалі ўжо 11 траўня. Пакуль фільм бачыла толькі абмежаванае кола людзей.
"Я пакуль не бачыў, але Сярога глядзеў, і яму вельмі спадабалася. Атрымоўваецца, пакуль толькі вузкае кола людзей бачыла. Толькі ўвосень ён выйдзе ў масавы пракат".
Песню Сяргей Курэк не пісаў адмыслова для фільма. Яна ўвойдзе ў першы альбом музыкі разам з яшчэ дзесяццю трэкамі.
Сяргея Курэка ў “Энцыклапедыі беларускай папулярнай музыкі” называюць адным з лепшых блюзавых гітарыстаў Беларусі. Музыка жыве ў Гомелі, выступае з гуртом “Сяргей Курэк і Night Drive” у Беларусі, Расіі ды Польшчы.
Фільм "Дняпро" распавядае гісторыю выпадковай сустрэчы пары, якая па ўсіх жыццёвых стэрэатыпах ніколі б не сустрэлася. Адна ноч з жыцця эксцэнтрычнай дзяўчыны і загадкавага мужчыны ўціснута ў 75 хвілін. Кожны эпізод іх стасункаў перамяжоўваюцца кадрамі натурных здымак Дняпра. Сюжэт развіваецца разам з плынню ракі, а кульмінацыя ды развязка супадаюць з упадзеннем яе ў Чорнае мора.