"Ляпісы" прэзентавалі новую песню на беларускай мове (відэа)

Гурт Ляпіс Трубяцкой прэзентаваў новую песню на беларускай мове "Цмок ды Арол".

Зноў святкаваў Івана Купала

Каля беларускага вакзалу.

Вялікая Грузінская, Бутырскі вал –

Папараці кветку ўначы шукаў

Дзе мая мама, дзе мая Зеля?

Быў Мазэль, а стаў Ямелем.

Блукаю па свеце, як сабака блахасты,

А ў Менску чакае хворы тата.

Белыя воблакi, чорны анёл!

Старыя ворагi – Цмок ды Арол!

Белыя воблакi, чорны анёл!

Старыя ворагi – Цмок ды Арол!

Раззлаваў хам шклоўскага пана,

Нарадзіўся беларусам – стаў цыганам.

Каціся па свеце на бусліку-ровары,

Вясёлая батлейка, кажы містэрыю.

Дзе мой Паўлiк? Дзе мая Вольга?

Гуляй, музыка, вандроўную польку!

Стаптаў боцiкi, знасiў адзёжу,

Вяртайся на Радзiму, злодзей Сярожа!

- спявае Сяргей Міхалок.

Пра стварэнне новай кампазіцыі Еўрарадыё беларускіх “рок-рэвалюцыянераў” расказаў дырэктар гурта Яўген Калмыкоў.

Яўген Калмыкоў: “Гэта песня – аўтарска-інтымная. Што раней часта можна было пачуць ад “Ляпісаў”, а зараз – даволі рэдка. Там ён (Міхалок – Еўрарадыё) спявае: “Дзе мой Паўлік, дзе мая Зеля? У Мінску чакае хворы тата, ён жыве на Беларускім вакзале” – гэта песня аўтабіяграфічная”.

Што тычыцца музычнага стылю будучага альбома, то Калмыкоў класіфікуе яго, як “ска-кор”. А па змесце альбом будзе “бескампрамісны”, у стылі песні “Не быць скотам”. І надзённым.

Яўген Калмыкоў: “У нас часта атрымліваецца так: мы рыхтуем нейкую песню, а потым атрымліваецца, што яна вельмі злабадзённая. Так, да прыкладу, было з песняй “Не быць скотам!”  У нас часта атрымліваецца так, што мы не тое, каб хутка рэагуем, а фантазуем нейкую сітуацыю, а потым высвятляецца, што пакуль песня рыхтуецца – яна стала вельмі нават актуальнай. Я думаю, што ў гэтым альбоме будзе не адно такое патрапленне”.