Лукашэнка пагражае вярнуць памілаваных палітвязняў за краты

Такую заяву ён зрабіў 21 красавіка ў часе рэспубліканскага суботніка. Аляксандр Лукашэнка падкрэсліў, што памілаваныя апазіцыянеры выйшлі з турмы не праз ціск Еўрасаюза.

“Не напісалі б прашэнне аб памілаванні — сядзелі б дагэтуль, і тыя, хто там застаўся і не напісаў гэты зварот на імя прэзідэнта, будуць сядзець. Вось і ўвесь ціск. Ніхто на мяне тут не націсне”, — цытуе кіраўніка краіны БЕЛТА.

Пры гэтым Лукашэнка распавёў, што, прымаючы рашэнне аб памілаванні, улічваў асабістыя аспекты: наяўнасць маленькага дзіця ў аднаго і праблемы са здароўем у другога памілаванага. Гаворка ідзе пра выпушчаных на волю тыдзень таму Андрэя Саннікава і Змітра Бандарэнку.

Таксама беларускі лідар закрануў і тэму вяртання амбасадараў краін Еўрасаюза: “Вось яны цяпер кажуць: націснулі, таму амбасадараў пусцілі. Мы, наадварот, амбасадарам сказалі: хлопцы, вы паехалі, пабудзьце там, амбасадары сёння выказалі пажаданне вярнуцца сюды. Але трэба ж перакруціць сітуацыю, каб нібыта захаваць аблічча. Такія людзі ўсё ж не дурні, яны гэта разумеюць”.