Лукашэнка: Калі бізнэс дапамагае апазіцыі — гэта барацьба супраць дзяржавы
Аляксандр Лукашэнка перасцярог беларускі бізнэс пра недапушчальнасць удзелу ў палітычнай барацьбе, тым больш у фінансаванні апазіцыі.
Гэта адбылося ў аўторак на нарадзе па дзейнасці Савета па развіцці прадпрымальніцтва. "Калі хтосьці з бізнэсмэнаў будзе фінансаваць пятую калону ці нейкім іншым спосабам аказваць негатыўны ўплыў на грамадства, то я буду лічыць, што яны ўключыліся ў палітычную барацьбу, барацьбу супраць дзяржавы. А там свае законы, хай потым не крыўдзяцца падобныя бізнэсмэны", — перадае interfax.by словы кіраўніка Беларусі.
Акрамя таго, Лукашэнка папярэдзіў бізнэсоўцаў, каб яны не спрабавалі ўздзейнічаць на органы дзяржаўнай улады і стваралі там для сябе "дах".
Па словах беларускага кіраўніка, яго сёння ніхто не можа папракнуць у тым, што ён "кагосьці сілком прымушае дапамагаць дзяржаве". "Я роўна набліжаны да ўсіх — бізнэсмэнаў, небізнэсмэнаў, якія жадаюць дабра нашай краіне", — заявіў Лукашэнка.
