Луканін: вернікі "Новага жыцця" ўспрынялі вестку з суда, як цуд
Пратэстанскую царкву "Новае жыццё" высяляць не будуць. Адміністрацыя ЖРЭА Маскоўскага раёна сталіцы заявіла, што адмаўляецца ад яе будынку.
Нагадаем, 27 лістапада царква "Новае жыццё" атрымала пастанову Вышэйшага гаспадарчага суду, згодна з якой павінна была да 5 снежня пакінуць свой будынак у Мінску па вуліцы Кавалёва, 72. За гэты будынак вернікі змагаліся сем гадоў. А ўчора з Гаспадарчага суда сталіцы паведамілі, што пагрозы высялення больш няма. Навіна была агучаная, калі ў царкве былі вернікі і ішла малітва. Прысутныя ўспрынялі гэта, як цуд.
Вось што распавёў Еўрарадыё юрыст царквы Сяргей Луканін:
"Канешне, мы не ведаем, што там на самой справе адбывалася, чаму яны спачатку падалі гэты ліст, а пасля яго адклікалі. Але мы гэта будзем успрымаць, як першы крок з боку ўлады ў бок наладжвання нашых адносін, і ў бок таго, каб вырашыць да канца праблему з будынкам царквы".
Адзначым. што будынак дагэтуль належыць ЖРЭА Маскоўскага раёна. Па словах Луканіна, цяпер царква будзе імкнуцца весці дыялог, каб вырашыць усе праблемы і каб у далейшым "такога напружання не ўзнікала".
Фота — svaboda.org
