Генпракуратура шукае стваральнікаў "валютнага" сайта prokopovi.ch
Пра гэта паведаміў начальнік упраўлення Генпракуратуры па наглядзе за выкананнем заканадаўства і законнасцю прававых актаў Павел Радзівонаў.
Па яго словах, Генпракуратура вынесла пастанову пра абмежаванне доступу да інтэрнэт-рэсурсу, які прапагандуе незаконны абмен валюты. Абмежаванне доступу да рэсурсу распаўсюджваецца на дзяржаўныя ўстановы, адзначае БелаПАН.
Як заявіў прадстаўнік Генпракуратуры, на сайце ўсталёўваюцца адвольныя курсы абмену валюты і канверсіі, не адпаведныя курсам абмену ў банках. Генпракуратура лічыць такую дзейнасць незаконнай.
Радзівонаў паведаміў, што Генпракуратура працягне выяўляць такія сайты і абмяжоўваць доступ да іх. Сачыць за гэтым будзе Беларуская дзяржаўная інспекцыя па электрасувязі.
А вось звесткі, што аналагічную службу адкрыў партал tut.by, для прадстаўніка Генпракуратуры стала адкрыццём.
