FEMEN: Пасля выказвання Лукашэнкі міліцыя падтрымала наш пратэст!
Лідэр украінскіх феміністак Ана Гуцол у жывым эфіры Еўрарадыё распавяла пра "беларускую" акцыю, якая прайшла ў Кіеве. (ГУК)
Акцыя "Рагаткі да бою!" прайшла на Майдане Незалежнасці ў Кіеве. Яе "ў падтрымку ахвяр "крывавай нядзелі" у Беларусі" правёў жаночы рух FEMEN.
Як сказала ў жывым эфіры Еўрарадыё лідэр украінскіх феміністак Ана Гуцол, удзельніцы акцыі "расстралялі памідорамі і яйкамі з рагатак, зробленых з нашых целаў" партрэт кіраўніка Беларусі. Паводле яе словаў, паглядзець на акцыю сабралося шмат мінакоў і прэсы.
Таксама феміністкі распаўсюдзілі зварот да міжнароднай супольнасці, заклікаючы паспрыяць вызваленню беларускіх апазіцыянераў.
Ана Гуцол адзначыла, што "пасля апошняга выказвання Лукашэнкі (пра "вашывасць" украінскай улады — Еўрарадыё) міліцыя нават падтрымала наш пратэст".
Фота: femen.livejournal.com
