ЕС дапаможа Беларусі прыбраць смецце
Еўрапейскі Саюз выдзеліў Беларусі больш за 5 мільёнаў еўра на экалагічны праект, палова з якіх пойдзе на стварэнне прадпрыемстваў па перапрацоўцы смецця.
Такое пагадненне сёння ў Мінску падпісалі прадстаўнік ААН у
Беларусі Антоніус Брук, часовы павераны ў справах ЕС у Беларусі Жан-Эрык
Хальцапфель, міністр прыродных рэсурсаў Уладзімір Цалко і амбасадар
Венгрыі Ферэнц Контра.
Чакаецца, што сродкі пойдуць на стварэнне нарматыўнай базы, распавёў прадстаўнік ААН у Беларусі Антоніус Брук.
"Рэалізоўвацца
праект будзе 3 гады. Асноўная ўвага надзяляецца развіццю нарматыўнай
базы ў галіне кіравання воднымі рэсурсамі, абарачэнне з адкідамі,
захаванне біяразнастайнасці, экалагічная сертыфікацыя. А таксама
рэалізацыя дэманстрацыйных праектаў у галіне кіравання цвёрдымі бытавымі
адкідамі. Эфект ад праекта будзе бачны на ўсёй тэрыторыі Беларусі".
Асаблівая роля надаецца праектам па стварэнні заводаў па перапрацоўцы адкідаў у Кобрыне і Мастах, кажа Ўладзімір Цалко.
"З
5 мільёнаў еўра палова накіраваная на два пілотныя праекты у Кобрыне і
Мастах. Гэта пачынаючы з закупкі тэхнікі для зборкі смецця, кантэйнераў,
машынаў, да апошніх тэхналогій кіравання гэтымі працэсамі. Гэта
стварэнне вытворчасці на базе еўрапейскіх стандартаў".
Паводле
загаду кіраўніка краіны, адзін з заводаў мусіць быць скончаны у 2011
годзе. Але калі новае пакаленне ўжо гатовае да паасобнага збору смецця,
то тэхнічна жыллёвы фонд пакуль не гатовы, кажа міністр.
"Я
зараз кажу пра шматпавярховікі. Як сёння ў адзін смеццеправод чатыры
трубы паставіць? Вельмі шмат тэхналагічных пытанняў застаецца".
Мінпрыроды прапануе ўвогуле адмовіцца ад смеццеправодаў і арганізаваць усё, як у Еўропе.
На
бліжэйшыя гады запланавана здабываць з другасных матэрыяльных рэсурсаў
да 70 працэнтаў матэрыялаў. Таму што кожны год Беларусь мае 3 мільёны
тон адкідаў.
Нягледзячы на тое, што Беларусь
дасягнула шмат у гэтай сферы, маюцца некаторыя праблемы, якія трэба
вырашаць, кажа часовы павераны ў справах ЕС у Беларусі Жан-Эрык Хальцапфель.
"Неабходна
інтэграваць ахову навакольнага асяроддзя ў агульную палітыку Беларусі, а
таксама падвысіць эфектыўнасць сельскай гаспадаркі, лесаапрацоўкі ды
іншых галінаў прамысловасці Беларусі. Цікавасць ЕС у галіне аховы
навакольнага асяроддзя ў Беларусі заключаецца ў лепшым кіраванні
адкідамі і абароне біялагічнай разнастайнасці ў Беларусі".
Праект, які стартаваў сёння, павінен развіваць міжнароднае супрацоўніцтва ў сферы аховы навакольнага асяроддзя.
