Дзед Мароз завітаў на беларускую ялінку ў Варшаве (фота)
Сапраўднае навагодняе свята для дарослых беларусаў і маленькіх беларусікаў прайшло ў Беларускім доме ў Варшаве.
Увечары 30 снежня ў будынку гэтай арганізацыі сабралася некалькі дзесяткаў чалавек, каб адсвяткаваць надыходзячы Новы год. І хоць у польскай сталіцы ў апошнія дні назіраецца зусім не зімовае надвор'е, атмасфера мерапрыемства дапамагла цалкам адчуць свята.
У гульнях, конкурсах і карагодах вакол елкі ўдзельнічалі як маленькія дзеткі, так і іх бацькі. Таксама і Дзед Мароз не забыў прынесці з сабой падарункі. Скончылася святкаванне салодкім сталом.
