КДБ Беларусі заяўляе, што не здымаў мінскую сустрэчу Удальцова з грузінамі
Ніякіх матэрыялаў датычна сустрэчы ў Мінску Сяргея Удальцова і грузінскіх палітыкаў беларускія спецслужбы сваім расійскім калегам не перадавалі.
17 кастрычніка газета “Известия” са спасылкай на афіцыйнага прадстаўніка Следчага камітэта Расіі Уладзіміра Маркіна напісала, што кампрамат на Удальцова збіраў беларускі КДБ. Але па словах кіраўніка Цэнтра інфармацыі і грамадскіх сувязяў КДБ Беларусі Аляксандра Антановіча, беларускія спецслужбы не могуць нават пацвердзіць той факт, што расійскі апазіцыянер сустракаўся з грузінскімі “спонсарамі” ў Мінску.
Аляксандр Антановіч: “Інфармацыі, што менавіта гэтыя падзеі адбываліся ў Беларусі і канкрэтна ў Мінску, мы не маем. Што тычыцца таго, якім чынам здымалі, схаванай ці не схаванай камерай. Калі казаць прафесійнай мовай спецслужбаў, размова можа ісці, хутчэй, пра двурушніцтва ўдзельнікаў гэтай сустрэчы”.
Лідар “Левага фронту”, адзін з натхняльнікаў антыпуцінскіх пратэстаў Сяргей Удальцоў праходзіць па крымінальнай справе аб падрыхтоўцы да арганізацыі масавых беспарадкаў. Падставай для расследавання стаў дакументальны фільм тэлеканала НТВ “Анатомія пратэсту-2”, у якім сцвярджаецца, што апазіцыя рыхтуе дзяржаўны пераварот на замежныя грошы.
