Следчы камітэт Расіі распачаў крымінальную справу супраць Сяргея Удальцова
Нагодай стала сустрэча з грузінскімі парламентарамі і дыпламатамі, якая адбылася ў Мінску ў чэрвені 2012 года.
Дэталі гэтай сустрэчы былі выкладзеныя ў дакументальным фільме тэлеканала НТВ “Анатомія пратэсту ― 2”. Каардынатару “Левага фронта” Сяргею Удальцову, а таксама актывістам Леаніду Развазжаеву і Канстанціну Лебедзеву інкрымінуюць падрыхтоўку да арганізацыі масавых беспарадкаў.
Следчы камітэт Расіі (СКР) прызнаў сапраўднымі відэаматэрыялы, атрыманыя ад тэлекампаніі НТВ:
"Выяўлена, што голас, у тым ліку прысутны ў сюжэтах, знятых утоенай камерай відэаназірання ў фільме "Анатомія пратэсту ― 2", належыць Сяргею Удальцову. Сустрэча, фрагменты якой паказаныя ў фільме, адбывалася ў другой палове чэрвеня 2012 года ў жылым памяшканні ў сталіцы Рэспублікі Беларусь", ― са спасылкай на СКР паведамляе агенцтва РБК.
17 кастрычніка ў фігурантаў крымінальнай справы будуць праведзены ператрусы.
Фота: "Особая буква".
