Арганізатары "плюшавага дэсанту" ў аўторак адкажуць на позвы КДБ
Томас Мазэці, Пер Кромвэл і Ханна-Ліна Фрэй выдадуць у гэтай справе заяву.
Паводле слоў Мазэці, спачатку яны пабачылі позвы КДБ з прапановай з'явіцца ў Мінск для правядзення следчых дзеянняў на афіцыйным сайце дзяржбяспекі. Пазней невядомы, які прадстаўляўся журналістам, спрабаваў даведацца хатнія адрасы шведаў. І, нарэшце, позвы былі дасланыя на электронную пошту. Дарэчы, Мазэці называе гэты "ліст" "даволі цмяным", інфармуе "Радыё Свабода".
Нагадаем, на мінулым тыдні Камітэт дзяржбяспекі прапанаваў арганізатарам "цацачнага дэсанту" прыбыць да следчага на працягу 10 дзён. Пры сабе яны мусяць мець пашпарт або іншы дакумент, які сведчыць асобу. Пра час прыезду ім трэба паведаміць у КДБ загадзя. Калі шведы праігнаруюць позвы, ім пагражае да 6 месяцаў пазбаўлення волі.
Фота — AP Photo