Адраджаецца No Logo Fest ― рэгіянальная музычная прэмія ў Віцебску
Трохдзённы фэст пройдзе на мяжы вясны і лета. Арганізатары ставяць за мэту вызначыць лепшыя гурты Віцебшчыны за 2012-2013 гады.
Віцебскі рок-фестываль No Logo Fest вяртаецца ў змененым фармаце пасля трохгадовага перапынку. Арганізатары мерапрыемства вырашылі не толькі пазнаёміць публіку з мясцовымі гуртамі, але і вызначыць сярод іх лепшыя.
“Гэта будзе трохдзённы фестываль з 31-га траўня да 2-га чэрвеня, ― распавядае арганізатар імпрэзы Уладзімір Булаўскі. ― У Віцебску вельмі спецыфічная сітуацыя з канцэртамі, таму гэтыя дні звычайна з’яўляюцца закрыццём альтэрнатыўнага канцэртнага сезону. 31 траўня і 1 чэрвеня будуць конкурсныя дні, а 2-га чэрвеня ― гала-канцэрт, дзе будуць падводзіцца вынікі”.
Падача заявак на ўдзел у конкурсе працягнецца да 1 траўня 2013 г. Па выніках папярэдняга адбору арганізатары адбяруць 10 гуртоў, якія на іх думку вартыя змагацца за званне лепшага ў рэгіёне. Яшчэ 4 гурты аматары рока абяруць шляхам інтэрнэт-галасавання.
Якія будуць намінацыі, апроч “Гурт рэгіёна-2012”, арганізатары пакуль не вызначыліся. Маўляў, “магчыма, адзначым тых, хто падтрымлівае беларуску традыцыю, зладзім дадатковы конкурс гітарыстаў... Але пра гэта пазней, пакуль уся ўвага да непасрэдна арганізацыйных момантаў”.
