110 тысяч чарнобыльскіх ліквідатараў “пацярпелі”
Чыноўнікі не могуць патлумачыць, чаму ў пасведчанні чарнобыльца не будзе напісана слова "ліквідатар"
У Дэпартаменце па ліквідацыі наступстваў катастрофы на Чарнобыльскай АЭС кажуць, што ў Беларусі каля 110 тысячаў толькі ліквідатараў, а гэта цэлы горад. З 1 студзеня будучага года гэтыя 110 тысячаў ліквідатараў стануць проста пацярпелымі ад аварыі на ЧАЭС.
Не дзіва, што, як заўважаюць Еўрарадыё ў Мінгарвыканкаме, тыя не вельмі ахвотна ідуць мяняць старыя пасведчанні на новыя.
«У пасведчанні прапісваюцца артыкулы - для ліквідатараў і пацярпелых свае артыкулы», - кажуць Еўрарадыё ў адміністрацыі Першамайскага раёна Менска.
Юрысконсульт Дэпартамента па ліквідацыі наступстваў катастрофы на Чарнобыльскай АЭС Дар'я Мікалаеўна заўважае, што ліквідатары і чыноўнікі адзін аднаго проста не разумеюць. Маральнага канфлікту са словам "ліквідатар" чыноўнікі не бачаць. Нічога страшнага ў тым, што слова "ліквідатар" прыбралі, няма — ільготы ўсё роўна засталіся, гавораць чыноўнікі.
"Не так па сутнасці і важна, ліквідатар або пацярпелы — ільгот няма ні ў тых, ні ў іншых", — своеасабліва “пагаджаецца” ліквідатар наступстваў на Чарнобыльскай АЭС з горада Хойнікі 62-гадовы Віктар Васькевіч. Еўрарадыё спытала ў чыноўнікаў: дык навошта было прыбіраць слова, з-за якога такія спрэчкі? Ніхто не ведае:
"Вось чаму нельга было адлюстраваць — не ведаю. У 2009 годзе прымаўся закон, і ніхто гэтага ўжо не ўспомніць, чаму прыбралі слова “ліквідатар. Якая розніца, як гэта пасведчанне завецца?"
За даўнасцю часу ніхто не памятае, чаму слова “ліквідатар” прыбралі і замянілі яго на “пацярпелы”.
Ва ўказе прэзідэнта "Аб некаторых пытаннях абмену дакументаў, якія пацвярджаюць права грамадзян на льготы" “ліквідатараў” ліквідуюць канкрэтным пунктам: “словы "ўдзельніка ліквідацыі (...) замяніць словам "пацярпелага...”.