Расія забараняе пастаўкі малочнай прадукцыі з Беларусі
Рассельгаснагляд з 26 лютага ўводзіць часовыя абмежаванні на пастаўкі малака і некаторых іншых відаў малочнай прадукцыі з Беларусі. Пра гэта паведамляецца на сайце расійскага ведамства.
Нагодай называюць тое, што з нашай краіны ў Расію працягваюцца пастаўкі небяспечнай малочнай прадукцыі. Нараду з гэтай нагоды правёў намеснік кіраўніка Рассельгаснагляду Мікалай Уласаў.
Часовыя абмежаванні ўводзяцца да адпаведных перамоў з ветэрынарнай службай Беларусі і ўрэгулявання сітуацыі.
Пад санкцыі трапіла наступная прадукцыя:
— малако і вяршкі пастэрызаваныя, стэрылізаваныя і ультрапастэрызаваныя;
— малако і вяршкі сухія, канцэнтраваныя, кансерваваныя і згушчаныя;
— сыроватка малочная наліўная, канцэнтраваная, сухая;
— канцэнтрат сыроваткавы і малочны бялок.
Як раней паведамляла Еўрарадыё, цяпер пад разнастайнымі расійскімі абмежаваннямі знаходзяцца 42 беларускія прадпрыемствы, якія пастаўляюць малочную прадукцыю ў Расію.