Пуцін расказаў пра сваю галоўную мэту ў вайне супраць Украіны
Уладзімір Пуцін і Аляксандр Лукашэнка на касмадроме Усходні / kommersant.ru
Прэзідэнт Расіі Уладзімір Пуцін перакананы, што мэты і задачы яго вайны ва Украіне будуць выкананыя. Пра гэта расійскі кіраўнік казаў на касмадроме Усходні ў Амурскай вобласці. Гэтыя мэты ён назваў "зразумелымі" і "высакароднымі".
"Галоўная мэта — дапамога людзям на Данбасе. На жаль, кіеўскія ўлады адмовіліся выконваць Мінскія пагадненні. Працягваць далей трываць гэты генацыд было проста немагчыма", — сказаў Пуцін. Ён лічыць, што "сутыкненне з вырашчанымі ва Украіне антырасійскімі сіламі было непазбежнае".
Пры гэтым расійскі прэзідэнт лічыць, што ізаляваць Расію немагчыма. І сама Масква не мае намеру ізалявацца.
Разам з Пуціным на будпляцоўцы касмадрома знаходзіцца і Аляксандр Лукашэнка. Ён прыляцеў раніцай на Далёкі Усход. Пуцін даручыў "Раскосмасу" забяспечыць "падрыхтоўку і палёт на расійскім касмічным караблі прадстаўніка Беларусі".
Осмотр «Восточного». Путин, Рогозин и Лукашенко с сыном Николаем pic.twitter.com/4iK5o4Yp4e
— Кремлевский пул РИА (@Kremlinpool_RIA) April 12, 2022
Расія распачала вайну супраць Украіны 24 лютага. Першапачаткова Пуцін казаў пра намер "дэмілітарызаваць" і "дэнацыфікаваць" Украіну, каб "абараніць людзей" ад "генацыду з боку кіеўскага рэжыму". Але людзі ва Украіне мабілізаваліся і пачалі абараняцца. Вайна працягваецца ўжо паўтара месяца. За гэты час частка гарадоў ва ўсходняй Украіне аказалася разбураная. Украінская пракуратура кажа пра больш чым 6 тысяч ваенных злачынстваў і агрэсію, учыненыя на тэрыторыі краіны. Загінула каля 200 дзяцей, яшчэ каля 350 — параненыя.
