Пракуратура — пра звароты з просьбай пачаць справу па факце суіцыду Стахоўскага
Хлопец патлумачыў свой учынак крымінальным пераследам за ўдзел у мітынгах.
Пракуратура горада Мінска пракаментавала сітуацыю з паступленнем ад грамадзян "шматлікіх электронных зваротаў па пытанні распачацця крымінальнай справы па факце смерці Дзмітрыя Стахоўскага". Заяўляецца, што абскарджваць дзеянні і рашэнні органа, які вядзе крымінальны працэс, могуць толькі тыя, чые інтарэсы былі закранутыя. Звяртацца яны мусяць вусна ці пісьмова. Скаргі ў электронным выглядзе не разглядаюцца.
Юнак 25 траўня ў Мінску скочыў з 16-павярховага будынка. Перад гэтым ён пакінуў перадсмяротны пост у сацсетцы, у якім патлумачыў свой учынак крымінальным пераследам за ўдзел у пратэстах: "Віной таму стаў Следчы камітэт".
Дзмітрый Стахоўскі быў сіратой. Яго пахаваннем займалася адміністрацыя каледжа лёгкай прамысловасці і комплекснай лагістыкі, дзе ён вучыўся. Пасля таго, як абставіны яго суіцыду трапілі ў СМІ, у пракуратуру Мінска пачалі паступаць электронныя звароты з пытаннем, ці будзе заводзіцца крымінальная справа па факце яго смерці? Адказу на іх не будзе.
Каб сачыць за галоўнымі навінамі, падпішыцеся на канал Еўрарадыё ў Telegram.
Мы штодня публікуем відэа пра жыццё ў Беларусі на Youtube-канале. Падпісацца можна тут.