Прафілактычную мастэктамію Анджаліне Джалі ў Беларусі, хутчэй за ўсё, не зрабілі б

 

Анджаліна Джалі высветліла высокую верагоднасць у сябе раку грудзей болей за 87% дзякуючы даследаванню на выяўленне гена BRCA1. Гэты ген маюць людзі, у каго болей за 85-90% верагоднасць анкалогіі яечнікаў і малочнай залозы. А ці можна зрабіць такі аналіз беларусцы?

 

“Я разумею, вы хочаце зрабіць аналізы на верагоднасць, але мы гэтага не робім”, — адзін за адным кажуць у “Кравіры”, “Экамедсэрвісе” ды іншых прыватных медцэнтрах. Запісацца нават на такое распаўсюджанае даследаванне, як УГД, ці на прыём мамолага на чэрвень можна будзе ў канцы траўня.

 

Тэлефаную ў генетычную лабараторыю РНПЦ “Маці і дзіця”, тут здзіўляюць: маўляў, закрылі накірунак, бо… ніхто не прыходзіў:

 

“У нас было сапраўды такое даследаванне, але мы закрылі накірунак. Бо ніхто не прыходзіў!”.

 

Пра непапулярнасць даследавання кажуць і ў Мінскім гарадскім клінічным анкалагічным цэнтры.

 

 

“Прыйсці зрабіць аналіз, каб раз і назаўсёды зняць страх, даходзяць вельмі нямногія. Ці гэта страх, ці гэта спосаб — схаваць галаву ў пясок і будзе лягчэй? У нас працуе генэтык, які робіць прагноз, і па паказаннях мы робім даследаванне на выяўленне анкамаркёраў. Гэта такое ж даследаванне, як зрабіла вядомая актрыса”, — кажа намеснік галоўнага ўрача па медчастцы Мінскага анкацэнтра Святлана Сірэнка.

 

Спецыяліст дадае, што рак грудзей у беларусак — вельмі частае захворванне, і такі аналіз рабіць неабходна.

 

“Гэта анказахворванне на першым месцы сярод жанчын. І ў беларусак ў тым ліку. Мы за гэты год зрабілі 127 даследаванняў і выявілі 44 выпадкі захворванняў на рак. Па малочнай залозе стаіць на ўліку болей за 9 тысяч чалавек толькі па Мінску, а за першы квартал былі выяўлены 203 чалавекі з анказахворваннем малочных залоз”, — прыводзяць статыстыку ў Мінскім анкацэнтры.

 

 

Выяўленне гену BRCA1 азначае, што чалавек мае рызыку ўзнікнення анкалагічных захворванняў малочных залоз і яечнікаў ад 85-90%.

 

 

Запісацца на працэдуру можна ў любы час — чэргаў да генэтыка, які збірае анамнез і накіроўвае на аналізы, няма! Зараз гэта каштуе 600 тысяч рублёў і праводзіцца адзін раз у жыцці.

 

Магчыма, беларускі не ідуць на генетычны аналіз, таму што прафілактычную мастэктамію, як гэта зрабіла Джалі, у нас праводзяць толькі ў выключных выпадках.

 

“На сённяшні дзень прафілактычная мастэктамія, як гэта зрабіла Анджаліна Джалі, у Беларусі не праводзіцца. Гэтае пытанне вырашаецца на кансіліумах, і праводзіцца толькі лячэбная мастэктамія. Прафілактычная мастэктамія на шырокі паток не пастаўлена і вызначаецца індывідуальна, калі вельмі высокая рызыка”, — заўважае Святлана Сірэнка.

 

 

Тых, у каго выяўлены ген BRCA1 і 2, заведама адносяцца да тых, у каго рызыка ўзнікнення анказахворванняў высокая. Усё, што ад 50% — гэта высокая рызыка ўзнікнення захворванняў. Але будуць рабіць прафілактыку ці не залежыць ад індывідуальных фактараў, як то спадчыннасць і суправаджальныя захворванні. 

Дзе можна зрабіць генетычны аналіз крыві на анказахворванні

Мінскі гарадскі клінічны анкадыспансер (пр. Незалежнасці, 64. Тэл. 331 6197) – праводзяць скрынінг на ген BRCA;

Лабараторыя “Сінэво” (пр. Пераможцаў, 73/1; пр. Ракасоўскага, 113А; пр. Незалежнасці, 38; вул. Скрыпнікава, 1; вул. Гінтаўта, 12А, вул. Голубева, 19; тэл. 228-50-28) — даследаванне на анкамаркёры; 

РНПЦ імя Аляксандрава  (п. Лясны,2; тэл. 2654110) — даследаванне на анкамаркёры.