Пазнаёміліся, аб'ядналіся і самарадыкалізаваліся — МУС пра справу брата Латушкі
![Анатоль Латушка / фота з сацсетак](/sites/default/files/styles/gallery_main/public/2023-08/latuszka-0402-2.jpg.webp?itok=tTMqqsK-)
Анатоль Латушка / фота з сацсетак
У МУС расказалі пра затрыманне групы грамадзян, сярод якіх, як мяркуецца, быў і стрыечны брат Паўла Латушкі Анатоль.
Яго, а таксама яшчэ некалькі чалавек затрымалі ў Мінску 31 студзеня. Прычынай назвалі намаляванае імі графіці "Пагоня".
У МУС удакладнілі, што грамадзян затрымалі за тое, што яны "наносілі пратэсныя надпісы на фасады будынкаў, у пад'ездах жылых дамоў, у грамадскіх месцах". Акрамя таго, паводле звестак сілавікоў, яны пашкодзілі банеры з выявай міліцыянераў і спалілі дзяржаўны сцяг.
Колькі чалавек затрымалі, не паведамляецца. Гаворыцца толькі, што ім ад 30 да 60 гадоў, і ўсе яны "знаходзіліся ў экстрэмісцкіх Telegram-каналах і раённых чатах, у якіх пазнаёміліся, аб'ядналіся і самарадыкалізаваліся".
Анатоль Латушка — стрыечны брат палітыка Паўла Латушкі. Праваабаронцы ўжо прызналі Анатоля палітвязнем. Вядома таксама, што ў дзень затрымання яго збілі.
Каб сачыць за галоўнымі навінамі, падпішыцеся на канал Еўрарадыё ў Telegram.
Мы штодня публікуем відэа пра жыццё ў Беларусі на Youtube-канале. Падпісацца можна тут.