Павел Латушка: Мінкульт дапаможа “Песнярам” змагацца з замежнымі клонамі

Віншуючы “Песняроў” з 40-годдзем, міністр культуры Беларусі Павел Латушка паабяцаў дапамагаць гурту, у тым ліку, і з замежнымі клонамі. Такім чынам, Мінкульт пацвердзіў, што па-ранейшаму лічыць адзінымі сапраўднымі “Песнярамі” БДА пад кіраўніцтвам Вячаслава Шарапава. Падчас сваёй прамовы міністр выказаў пажаданне, каб гурт як мага часцей выступаў як у межах краіны, так і на замежных гастролях, перадае БЕЛТА. Усе ўмовы для развіцця ансамбля створаныя, — дадаў сп. Латушка. — Калектыў захоўвае мулявінскія традыцыі і ідзе далей, у ансамбль прыходзяць маладыя артысты, ёсць добрая студыя, шмат творчых планаў.

Нагадаем, неўзабаве ў продажы з'явіцца альбом БДА “Песняры” "Вольнаму воля". Паралельна ідзе праца над наступнай платкай на вершы Янкі Купалы. Альбом будзе звацца "Шчаслівасць". Яго рэліз запланаваны на канец 2009 года.